firansiyede 2 ming yawrodin töwen maash alidighanlarning maashi östürülidu

türkiye awazi radiyosi xewiri: firansiye pirézidénti makron sériq jilitkilikler toghrisida: «dölette nahayiti chongqur we heqliq ghezep-nepret mewjut. iqtisadiy we ijtimaiy xaraktérlik jiddiy halet élan qilimen. 2 ming yawrodin az maash alidighanlarning maashi östürülidu» dédi.

u eng töwen maashqa 2019-yil yanwardin bashlap 100 yawro qoshup bérilidighanliqini éytti we xususiy shirket wekillirigimu oxshash usulni tewsiye qildi. u mundaq dédi:

«buningdin burun qilghan sözlirimning kishilerni renjitkenlikini bilimen, yéqinqi 40 yil ichide kishilerning turmushining nacharlishishqa qarap mangghanliqini körduq, bu hélihem dawamlishiwatidu, bu heqtiki mesuliyetni qobul qilimen. biz yéqinqi 1.5 yil ichide, bu mesilige diqqet qilishta kéyin qalduq. silerge bashqa téximu muhim ishlar bardikidek tesirat berdim.»

u namayishlarda yüz bergen zorawanliqlarni héchqandaq shekilde kechürmeydighanliqlirini, her qandaq ghezep-nepretning saqchilargha qilinghan zorawanliqning toghriliqini körsitip bermeydighanliqini, sükütning hökümran bolushi kéreklikini bildürdi.

u bir tarixiy burulush nuqtisida turuwatqanliqlirini we mesilini diyalog yoli bilen hel qilidighanliqlirini eskertip: «pirézidéntliqqa namzat bolghanda bergen wedilirimni untup qalmidim. firansiyede perzentlirimizning bizdin téximu yaxshi turmush kechürüshini xalaymen» dédi.

u chongqur dölet islahatigha éhtiyajliq ikenliklirini, bu jehette xelqqimu muhim wezipilerning chüshidighanliqini qeyt qildi.

pirézidént makron neq meydan téléwiziye pirogrammisida mezkur bayanatini élan qilishtin burun, töt heptidin buyan namayish qilghan sériq jilitkilikler seweb bolghan «kirizis» ni hel qilish üchün her qaysi ishchilar uyushmilirining wekilliri bilen körüshti.

emgek ministiri muriyél pénikawd pirézidént makronning sériq jilitkiliklerning ghezipini peseytish üchün muhim bayanatlarni élan qilidighanliqini uqturghan idi.

sheher merkezliride öy ijrasining qimmet bolushi sewebidin sheher etrapida olturidighanlardin teshkillengen we 17-noyabirdin tartip namayish qilwatqan «sériq jilitklikler», makrondin iqtisadiy sharaitlarni yaxshilashni telep qilmaqta idi.

«sériq jilitkilikler» naraziliq bildürgen yéqilghu bahasining 2019-yili östürülmeydighanliqi élan qilinghan bolsimu, namayishchilar buni yétersiz dep qarap namayishlirini dawamlashturghan idi.