firansiyede namayishchilar pirézidént makronning istépa bérishini telep qildi

türkiye awazi radiyosi xewiri: firansiyede yéqilghu bahalirigha qoshumche baj qoyulushigha naraziliq bildürgen «sériq renglik jiletkilikler»ning parizh kordinatori téiriy pawul walét, yéqlighu bahalirigha qoshumche baj qoyulushining xata ikenlikini we namayishchilarning pirézidént émmanuél makronning istépa bérishni telep qiliwatqanliqini éytti.

pawul walét 15 kündin buyan hökümetke qarshi élip bériliwatqan namayishlar toghrisida anadolu agéntliqi muxbirining ziyaritini qobul qildi.

namayishlarning yéqilghu bahalirigha qoshumche baj qoyulushi tüpeyli bashlighanliqini eskertip ötken pawul walét:yéqilghu bahalirigha qoshumche baj qoyulushi bizning küchlük naraziliqimizni qozghidi, insanlar namayish ötküzmekte, ular éghir adaletsizlik we heqsizliq tuyghusi ichide turmaqta. her waqit oxshash tebiqe we siniptiki kishiler baj töleshke mejbur bolmaqta, dölitimizde puldarlar we yuqiri qatlam kishiliridin baj élinmaydu, insanlar pirézidént makronning bu siyasetlirige berdashliq bérip bolalmidi, shunga kochilargha chiqip namayish ötküzmekte, namayshichilar pirézidént makronning istépa bérishini telep qilmaqta, elwette buningdin bashqa teleplirimizmu bar, dédi.  

firansuzlarning dawamliq baj tölewérip baj töleshke öch bolup ketkenlikini eskertken pawul walét mundaq dédi: «namayishchilar makron yolgha qoyuwatqan islahat siyasetlirining el rayigha qoyulushini telep qilmaqta, makron xelqning telipini orundashning ornigha xelqni narazi qilip qoyuwatidu, xelq makronning bu ishidin tolimu biaram.»

pawul walét namayishlarning axirlishishining makron we hökümetning siyasitige baghliq ikenlikini eskertti.

«makron we hökümet namayishchilarning teleplirini orundimisa firansuzlar inqilab élip bérishqa mejbur bolidu»dégen pawul walét, namayishlar esnasida yüz bergen hadisilerning jawabkarining makron ikenlikini bildürdi.

«sériq jiletkilikler» ete parizhning simwolliridin bolghan kemps élisés kochisida keng kölemlik namayish ötküzidighanliqini bildürdi.

firansiyede élip bérilghan el rayini sinash paaliyitining netijisige asaslanghanda, firansuzlarning %84i «sériq jiletkilikler»ni qollaydiken.

firansiye miqiyasida yüz minglarche adem qatnashqan namayishlarda yüz bergen hadisilerde 2 adem ölüp 780 adem yarilandi, 794 adem nazaret astigha élinip 9 adem qamaqqa höküm qilindi.