астана йиғинида сүрийәниң игилик һоқуқи вә мустәқиллиқи тәкитләнди

түркийә авази радийоси хәвири: түркийә, русийә вә иран, қазақистан пайтәхти астанада өткүзүлгән 11-қетимлиқ капаләтчи дөләтләр йиғинида, сүрийәдики идлиб районидики уруш тохтитиш келишимигә хилап қилмишлардин әндишә қиилватқанлиқлирини билдүрүп, уруш тохтитишни назарәт қилишта бирликтә көрситиливатқан тиришчанлиқларни ашурушни қарар қилди.

қазақистан ташқи ишлар министири қайрат абдирахманов, түркийә, русийә, иран, бәшшар әсәд һакимийити вә өктичиләрниң һәйәтлири өзара учрашқан йиғинниң асасий бөлүмидә, йепилиш хитабнамәсини оқуди.

хитабнамәдә, тәрәпләрниң сүрийәниң земин пүтүнлүки вә мустәқиллиқини қоғдашни тәкитлигән һалда сүрийәдики даеш, нусра фирунти вә б д т хәвпсизлик кеңишиниң террорлуқ тизимликигә киргүзүлгән кишиләргә зәрбә беришниң давам қилидиғанлиқи тәкитләнди.

капаләтчи дөләтләр сүрийәниң нөвәттики вәзийитини муһакимә қилип, үч тәрәп һәмкарлиқини давамлаштурушниң қарар қилинғанлиқи алаһидә әскәртилгән хитабнамәдә, қошна дөләтләрниң дөләт хәвпсизликини нишан қилған бөлгүнчи һәрикәтләргә қарши ортақ ирадисини намайан қилинидиғанлиқлири қәйт қилинди.

тәрәпләр, йиғинда идлибта 17-сентәбир түзүлгән сочи келишимини иҗра қилиш керәклики үстидә пикир бирлики һасил қилип, изчил йүз бериватқан уруш тохтитишқа хилап қилмишлардин пәйда болған әндишәлирини тилға алди. капаләтчи дөләтләр уруш тохтитишқа хилап қилмишларни назарәт қилиш үчүн тиришчанлиқларни ашурушни қарар қилди. тәрәпләр буниң үчүн, түркийә-русийә-иран ортақ кординатсийә мәркизиниң вәзиписини алаһидә тәкитлиди вә идлибта уруш тохтитишни қоғдашниң терроризмға зәрбә бериш үчүн муһим икәнликини әскәртти.

тәрәпләр сүрийәдә химийәлик қоралларни ишлитишни күчлүк әйиблигәнликлирини, бу һәқтики доклатларниң химийәлик қоралларни чәкләш келишими рамкисида вә химийәлик қоралларни чәкләш тәшкилатиниң назарити астида тәкшүрүлүши керәкликини билдүрди.

капаләтчи дөләтләр сочидики сүрийә мәмликәтлик конгрәсидә чиқирилған қарарларға маслишип, җәнвәдә асасий қанун комитети қуруш сүритини тезләштүрүш вә әң қисқа вақит ичидә қурулуши үчүн сүрийәдики тәрәпләрни қоллаш қарарини чиқарди.

24-нойабирда түрмигә соланғанлардин һәр тәрәптин 10 дин кишини қойуп бериш үчүн иҗра қилинған лайиһәдин мәмнун икәнликлирини тилға алған тәрәпләр, бәшшар әсәд һакимийити вә өктичиләр арисида өзара ишәнчни күчәйтидиған тәдбирләр даирисидә, түрмидикиләрни қойуп бериш гурупписиниң хизмәтлирини йахшилашта пикир бирлики һасил қилди.

капаләтчи дөләтләр мусапирлар билән сүрийәдә йурт-маканлиридин мәҗбурий айрилғанларниң бихәтәр вә өзлири халиған һалда йурт-маканиға қайтиши үчүн зөрүр шәртләрни шәкилләндүрүш керәкликини әскәртти. буниң үчүн йурт-маканлиридин айрилғанларниң йурт-маканиға қайтиши үчүн хәлқаралиқ конферанс уйуштуруш хизмәтлири даирисидә, б д т мусапирлар алий комиссарлиқи билән бирликтә хизмәт қилишқа тәййар икәнликлирини билдүрди.

12-қетимлиқ астана йиғини 2019-йилниң феврал ейида өткүзүлиду.