florida ishtatida jumhuriyetchiler üstünlükni igilidi
amérikaning florida ishtatida ötküzülgen ottura mezgillik kéngesh palata saylimining netijiside özgirish boldi.
türkiye awazi radiyosi xewiri: florida ishtatida 6-noyabir ötküülgen ottura mezgillik saylamlarning netijisige körsitilgen naraziliq sewebidin béletler ikkinchi qétim qayta sanaldi. ishtatning hazirqi waliysi jumhuriyetchi rik skot texminen 10 ming awaz üstünlük bilen 2001-yildin tartip kéngesh palatasida ishtatqa wekillik qiliwatqan démokrat bil nélsonning aldigha ötti.
bil nélson twittérda bu heqte bayanat élan qildi. u: «ishlar biz ümid qilghandin bir az perqliq boldi, biraq néme bolushidin qetiynezer utturup qoyghanliqimni hés qiliwatimen» dédi.
jumhuriyetchi skotning ghelibe qilishi bilen, florida ishtatining kéngesh palatasidiki ikki orni bir esirdin kéyin, tunji qétim jumhuriyetchilerge ötti.
pirézidént donald tramp skotni twittérda tebriklidi. u: «desleptin tartipla rik skot qetiy tewrenmidi. u yaxshi waliy we florida ishtatigha wekillik qilidighan yaxshi palata ezasi bolidu. rik saylamda mushundaq chong xizmetlerni qilghanliqing üchün séni tebrikleymen» dédi.
skotning ghelibe qilishi bilen jumhuriyetchilerning kéngesh palatasidiki sani 52 ge chiqti, démokratlarning sani 47 de qaldi.
awam palatasida démokratlar 233 orunni qolgha keltürüp üstünlükini saqlap qaldi. jumhuriyetchilerning awam palatasidiki sani 199 da qaldi.
