ghezzede yüz bergen sürkilishte qan töküldi
israiliye urush ayropilanlirining ghezze rayonining herqaysi jaylirida élip barghan hawa hujumlirida 4 pelestinlik shéhit boldi, 8 pelestinlik yarilandi.
türkiye awazi radiyosi xewiri: ghezzediki sehiye ministirliqining bayanatchisi eshref elqudra bu heqte élan qilghan yazma bayanatida, israiliye ishghal küchlirining ghezze rayonining shimalida we refah shehirining sherqide bir guruppa pelestinlikni nishan qilghan hawa hujumlirida 4 kishining ölgenlikini, 8 kishining yarilanghanliqini bildürdi.
israiliye armiyesi teripidin bu heqte élan qilinghan bayanatta bolsa, qamal astidiki ghezze rayonidin israiliye terepke étilghan bir rakétamiyotning bir aptobusqa chüshüshidin kéyin, rayongha hawa hujumliri élip bérilishqa bashlighanliqi eskertilip mundaq déyildi: «urush ayropilanlirimiz ghezzediki nishanlargha zerbe bermekte.»
bayanatta, aptobus nishan qilinghan bu hujumning qandaq qoral bilen élip bérilghanliqi we ziyan heqqide melumat bérilmeslik bilen bir waqitta, ghezzedin israiliye terepke 80 din artuq rakétamiyot étilghanliqi, shuning bilen, rayonda agahlandurush signallirining chélinghanliqi bildürüldi.
israiliye jiddiy qutquzush orgini «qizil dawud yultuzi», ghezzedin étilghan rakétamiyotlardin birining bir binagha chüshüshi netijiside bir israiliyelikning ölgenlikini, birining éghir yarilanghanliqini uqturdi.
israiliye bash ministiri bényamin nétényahu ghezzening weziyiti keskinliship ketkendin kéyin paytext tél awiwde dölet mudapie ministiri aéwigdor libérman we bash ishtab bashliqi gadi éysénkot bilen körüshti.
