ilham eliyéw jon boltonni qobul qildi

türkiye awazi radiyosi xewiri: ezerbeyjan pirézidéntliq mehkimisining bildürüshiche, uchrishishta pirézidént ilham eliyéw, ezerbeyjan bilen oxshash bolmighan sahelerde utuqluq hemkarliqlarni ornatqan amérikining, yawropa xewpsizlik we hemkarliq teshkilati miniski guruppisining nöwetchi reisi bolush süpiti bilen, taghliq qarabagh mesilisige chare tépish musapiside muhim rol oynighanliqini éytti.

eliyéw, ezerbeyjan zéminlirining uzun yillardin buyan erméniyening ishghali astida turuwatqanliqini, 1 milyondin artuq ademning yurt – makanlirini tashlap kétishke mejbur bolup qalghanliqini xatiriletken halda, «bu, erméniyening xelqara qanun – pirinsiplarni mushtumzorlarche depsende qilghanliqining roshen pakitidur. b d t  xewpsizlik kéngishi, erméniye qoralliq küchlirining ishghal astidiki zéminlardin derhal we shertsiz chékinip chiqip kétishi toghrisida qarar maqullidi. erméniye bu qarargha pisent qilmastin, mewjut haletni saqlap qélishqa tirishmaqta. bu qobul qilish mumkin emes, bir ishtur. ezerbeyjanning zémin pütünlüki kapalet astigha élinishi lazim. ezerbeyjan, yawropa xewpsizlik we hemkarliq teshkilati miniski guruppisining teng hoquqluq bashliq döletlirining paaliyetlirining ünümge érishishini ümid qilidu» dédi.

u yene, amérika qoshma ishtatliri dairilirige ezerbeyjan tebiiy gazini yawropagha yetküzidighan jenubiy gaz karidori qurulushi layihesini qollap – quwwetligenliki üchün minnetdarliq bildürdi.

jok boltonmu, ezerbeyjan bilen bolghan munasiwetlerning amérikigha nisbeten muhim orunda turidighanliqini tekitlep, siyaset, iqtisad, xewpsizlik we bashqa sahelerdiki hemkarliqlarning ehmiyitining kücheygenlikini bildürdi. u, amérikining istratégiyelik orni nahayiti muhim bolghan ezerbeyjan bilen énérgiye, xelqara térrorizm, adem etkeschilikige qarshi küresh we bashqa sahelerdiki hemkarliqlarni téximu ilgiri sürüshni xalaydighanliqini qeyt qildi.

taghliq qarabagh mesilisining ezerbeyjangha nisbeten eng muhim mesile ikenlikini nahayiti yaxshi bilidighanliqini bildürgen bolton, mesilini hel qilish musapisidiki ehwallargha ezerbeyjan terepning qandaq qaraydighanliqi toghrisida téximu köp melumatqa ige bolushni xalaydighanliqini éytti.

uchrishishta, amérika – ezerbeyjan munasiwetlirining köp tereplimiliki toghrisida pikir almashturuldi. bolton, ziyaretliri dairiside ezerbeyjan tashqi ishlar ministiri elmar memedyarow qatarliq bezi rehberlermu bilen körüshti.