шиветсийәдә ашқун оңчи демократлар йуқири авазға еришәлмиди

түркийә авази радийоси хәвири: түнүгүн шиветсийәдә өткүзүлгән омумий вә йәрлик сайламларниң дәсләпки нәтиҗилиригә асасланғанда, сотсийал демократлар партийәси %26.2 авазға еришип биринчи, ашқун оңчи демократлар партийәси %19.2 авазға еришип иккинчи болған.

сайлам сандуқ бешидики рай синаш нәтиҗилиридә көрситилишичә, баш министир стефан лөфвен башчилиқидики сотсийал демократ партийәси сайламдин биринчи болуп утуп чиқсиму, һазирқи әһвалда һакимийәт бешидики сол блок, оң блокниң орнини алидикән.

шиветсийәдә 7.5 милйон сайлиғучи қатнашқан бу қетимқи сайламда, шу йәр вақти кәч саәт 20:00, үрүмчи вақти 00:00 дә ахирлашти.

ғәйрий рәсмий нәтиҗиләргә асасланғанда, оң блоктики партийәләр %39.6 әтрапида, һакимийәт бешидики сол блоктин орун алған партийәләр %39.4 авазға еришкән. 349 кишилик парламентта, оң блоктики партийәләр 141 орунға, сол блоктики партийәләр 140 орунға еришкән. ашқун оңчи сотсийал демократлар партийәси болса, парламентта 68 орунға еришкән. мәзкур партийә өткәнки сайламларда парламентта 20 орунни қолға кәлтүргән иди.

шиветсийә таратқулиридики хәвәрләргә қариғанда, сайлам мушу нәтиҗиләр билән ахирлашқан әһвалда консерватип партийә рәһбәрликидики оңчи блокниң һөкүмәт қуруши пәрәз қилиниватқан болуп, ашқун оңчи сотсийал демократлар партийәси билән бирләшмә һөкүмәт қурулмайдикән.