kataloniye bashliqi: nishanimiz musteqilliqtur, dédi

türkiye awazi radiyosi xewiri: kataloniye aptonom hakimiyiti bashliqi kiyum torra ispaniye merkizi hökümitidin téximu köp hoquq emes musteqilliq üchün el rayini sinash paaliyiti ötküzüshni telep qilip, rayondiki musteqilliqni yaqlighuchilarni namayishqa chaqirdi.

torra barsélonada «bizning peytimiz»namida nutuq sözlep, ispaniye merkizi hökümet bilen kataloniyening kélechiliki üstide söhbet ötküzüshke teyyar ikenlikini, zorawnliqqa bolsa qarshi turidighanliqini éytti.

bash ministir pédro sanchézning «téximu köp hoquq bérilgen aptonomiyeni el rayigha qoyush» teklipining yéterlik emeslikini éytqan torra: nöwettiki mesilini xelqara teripidin étirap qilinghan musteqilliq el rayini sinash paaliyiti toluq hel qilidu, dédi.

torra musteqilliq yolidin qetiy waz kechmigenliklirini alahide eskertip ötüp mundaq dédi: «nishanimiz tolimu ochuq, u bolsimu jumhuriyet tüzümidiki musteqil kataloniye dölitidur.»

musteqilliqni yaqlighuchilarni pat yéqinda ötküzülidighan el rayini sinash paaliyitige aktip qatnishishqa we namayishqa chaqirghan torra, namayishlargha qanche köp kishi qatnashsa buning ispaniye hökümitining kataloniyege öz teqdirini özini belgilesh hoquqi bérishige paydisi bolidighanliqini tekitlep ötti.

musteqilliqni telep qilishi sewebidin sotlanghan kataloniyelik siyasetchiler we ammiwi teshkilat rehberlirining derhal qoyup bérilishi lazimliqini éytqan torra:erkinlik, erkinlik, dep shoar towlidi.

bultur 1-öktebirde ötküzülgen we ispaniye asasiy qanun mehkimisi teripidin qanunsiz élan qilinghan musteqilliq el rayini sinash paaliyitidin kéyin kataloniye parlaménti 27-öktebirde öz aldigha musteqilliq élan qildi.

buninggha qarita ispaniye merkizi hökümiti kataloniye hökümitini tarqitiwétip, rayonni özi biwaste bashqurushqa bashlidi, arqidinla ispaniye sot mehkimilirimu kataloniye hökümitining bezi mesullirini qolgha élishini qarar qildi. 21-dékabirda ötküzülgen baldur saylamda musteqilliqni yaqlaydighan partiye azla perq bilen utup chiqip hökümet qurup chiqti.

kataloniyening musteqilliqini yaqlighuchilarning musteqilliq el rayini sinash paaliyiti ötküzüsh telipige qarshi chiqqan ispaniye bash ministiri pédro sanchéz,  kataloniyege téximu köp aptonomiyelik hoquq bérilishi üchün el rayini sinash paaliyiti ötküzüshni teklip qildi.

üstide tutush buyruqi chiqirilghan kataloniyening sabiq bash ministiri karlés puygdémont nöwette bélgiyede yashimaqta, ispaniye merkizi hökümet bilen kataloniye yerlik hökümet arisida sürkilish dawamlashmaqta.