сүрийә вә ирақта йәнила нурғун даешчиниң барлиқи билдүрүлди
б д т даеш, әл нусра қатарлиқ террорлуқ тәшкилатлири тоғрулуқ доклат елан қилди
түркийә авази радийоси хәвири: бирләшкән дөләтләр тәшкилати сүрийә вә ирақта даеш еғир мәғлубийәткә учриған болсиму, йәнила бу дөләтләрдә 20миңдин 30миңғичә даеш әзаси барлиқини уқтурди.
б д т хәвпсизлик кеңишигә тәқдим қилинған даеш вә әл-қаидигә мунасивәтлик доклатта, даеш әзалириниң көп қисиминиң афғанистанлиқ икәнлики әскәртилди.
доклатта афғанистанда 3500 билән 4000ғичә даеш әзасиниң барлиқи билдүрүлди.
ливийәдә 3000дин 4000ғичә даеш әзасиниң барлиқи әскәртилгән доклатта, даешчиларниң сүрийәниң шәрқидә һелиһәм қаршилиқ көрситиватқанлиқи, ирақта даешниң чаңгилида йәрләр болмисиму, лекин йошурун маканлири барлиқи қәйт қилинди.
ийордан чеграсидики руқбан лагерида йашаватқан даеш террорчилириниң бала-чақилири арисиға террорчиларниң соқунуп киривелиш еһтималиниң барлиқи әскәртилгән доклатта, сүрийәдә һазир әң күчлүк террорлуқ тәшкилатиниң әл-нусра икәнлики билдүрүлди.
әл қаидә террорлуқ тәшкилатиниң сомали, йәмән, җәнубий асийада террорлуқ тәшкилати даешқа қариғанда техиму күчлүк икәнлики билдүрүлгән доклатта, әл қаидиниң узун мәзгил ичидә хәлқара бихәтәрликкә даешқа қариғанда техиму күчлүк хәвп елип келидиғанлиқи әскәртилди.
йәмәндиму 250дин 500ғичә даеш әзаси барлиқи, лекин 6000дин 7000ғичә әл қаидә әзасиниң барлиқи тәкитләнди.
доклатта йәнә сомалидиму әл қаидигә четишлиқ әш-шәбабниң күчлүк икәнлики, лекин даешниң мәркәз вә сомалиниң җәнубиға қарап илгириләш нишаниниң барлиқи билдүрүлди.
