амули: хәлқни бесим арқилиқ җимиқтуруш йаман ақивәтләрни елип келиду

түркийә авази радийоси хәвири: амули, шималий теһран райони җамаәт хәвпсизлик мәсуллири билән учрашқан йиғинда сөз қилип, «җәмийәт аманлиқини сақлиғучи күчләрниң вәзиписи дөләтни бихәтәр һаләткә кәлтүрүштур. хәлқни бесим арқилиқ җимиқтуруш аччиқ ақивәтләрни елип келиду» деди.

у, хәвпсизлик күчлириниң тиришчанлиқ көрситип хәлқниң наразилиқини пәскойға чүшүрүши вә алдини елиш характерлик чарә – тәдбирләрни йолға қойуп, ғәрәзлик пиланларни бузуп ташлиши керәкликини тәкитлиди.

амули, апрел ейида әмгәк ишлири министири әли рәбии билән көрүшкән йиғинида, ирандики иқтисадий мәсилиләрниң пәйда қилиш еһтимали болған нуқтиларға ишарәт қилип, «әгәр бу хәлқ қозғилип кәтсә, һәммимизни деңизға төкиду» дегәниди.

доллар баһасиниң сүрәт билән өрләп кетишидин кейин, өткән ай пайтәхт теһранниң әң муһим сода мәркәзлириниң бири болған «бүйүк базар» содигәрлириму иқтисадий йөнилишни сәвәб қилип дуканлирини тақивәткән, бу әһвал иран миқйасида йеңи наразилиқ намайишлириниң башлинишини кәлтүрүп чиқарғаниди.

һөкүмәтниң иқтисадий саһәдә йолға қойған чарә – тәдбирлири долларниң өсүшини тосуп қалалмиғандин сирт, пул – муамилә базарлиридики киризисни техиму еғирлаштурувәтти. әркин базарда доллар 10 миң түмәндин ешип кәтти.

ташқи перевоттики туйуқсиз өрләп кетиш хәлқниң сетивелиш күчини аҗизлитивәткән, хизмәт – сода орунлири арқа – арқидин тақилип қалған, ишсизлиқ барғанчә еғирлишип кәткән иранда, хәлқ иҗтимаий таратқулар арқилиқ «омумйүзлүк иш ташлаш вә намайиш өткүзүш» кә чақирилмақта.