pakistan adalet herikiti türkche uchur hembehirlidi
pakistanda ötküzülgen fédératsiye parlamént saylamlirida ghelibe qilghan pakistan adalet herikiti (PTI) ning twittér bétide türkche uchur hembehirlendi.
türkiye awazi radiyosi xewiri: pakistan adalet herikiti twittér bétide türkche uchur hembehirlidi. hembehirlengen uchurda, türkiye jumhur reisi rejep tayyip erdoghanning pakistan adalet herikitining rehbiri imran xangha téléfon qilip, 25-iyul ötküzülgen saylamlarda qolgha keltürgen ghelibisini tebrikligenliki bildürüldi.
pakistan adalet herikitining resmiy twittér bétide üch türkche uchur hembehirlengen bolup, bularning birinchiside: «jumhur reis rejep tayyip erdoghan imran xangha téléfon qilip, uni tebriklidi»؛ ikkinchiside: «türkiye-pakistan munasiwetlirini téximu tereqqiy qildurushning ehmiyitini tekitlidi»؛ üchinchiside: «imran xanmu jumhur reis rejep tayyip erdoghanning köngül bölgenlikige teshekkür éytti» déyildi.
bu uchurlar bashqilar teripidinmu yüzlerche qétim qayta hembehirlendi we yaqturuldi. pakistanliq twittér abontliri türkche inkas qayturup, türkiyege bolghan söygüsini ipadilidi.
pakistan adalet herikiti 25-iyul ötküzülgen fédératsiye we ishtatliq parlamént saylamlirida, pakistan parlaméntida 116 orunni, ishtat saylimida töt ishtatning birini qolgha keltürdi.
