җамәгә һуҗум қилған җинайәтчигә 150 йиллиқ қамақ җазаси бериш тәләп қилинди

түркийә авази радийоси хәвири: канадада бир җамә һуҗумчисиға 150 йиллиқ қамақ җазаси бериш тәләп қилинди. җавабкар александерниң делосиға қараватқан тәптиш хадими томас җәквисниң тәлипи, канада тарихида бир киши үчүн тәләп қилинған әң узун қамақ җазаси болуп қалди.

тәптиш хадими җәквис җавабкар александер етирап қилған җинайәткә, у өлтүргән һәр бир киши үчүн биринчи дәриҗилик җинайәт категорийәсидин 25 йилдин қамақ җазаси берилиши керәкликини тәкитләп, җәмий 150 йиллиқ қамақ җазаси берилишини тәләп қилди.

 у александер өткүзгән җинайәтниң дөләт тарихида көрүлүп бақмиғанлиқини әскәртип, сотчидин җавабкарни шәртлик қойуп бериш имканийитидин пайдиландурғузмаслиқниму тәләп қилди.

сотчи франчойис хот җавабкар александерниң җинайитиниң, бир гуруппини вә мусулманларни нишан қилғанлиқи нуқтисидин илгири көрүлүп бақмиған җинайәт икәнликини билдүрди. сотчи франчойс хот мундақ деди:

"һәммигә мәлум болғинидәк, 50 дин 52 гичә болған зийанкәшликкә учриғучи мәлум бир гуруппиға тәвә болғанлиқи үчүн нишан қилинғанлиқи, илгири көрүлүп бақмиған бир әһвал. қорқунчлиқ бир әһвални адәмни дәһшәткә салидиған йәнә бир әһвал билән селиштуруш наһайити қийин."

җавабкар александерниң адвокатлири шәртлик қойуп берилиштин илгири мәһбусларниң түрмидә өлүши билән нәтиҗилинидиған еғир җазаларниң асасий қанунға хилап икәнликини билдүрүп, җавабкарниң шәртлик қойуп берилишини тәләп қилмақта.

сот җәрйанини көзитиватқан кубек ислам мәдәнийәт җәмийитиниң башлиқи муһәммәд лабиби тәптиш хадиминиң тәлипиниң, бу хилдики чүшәнчә вә қараштики кишиләргә сигнал болуши керәкликини тәкитлиди. у: "бундақ һуҗумларниң қәтий йүз бәрмәслики үчүн күчлүк қарарлар берилиши лазим. александер мушу вақитқичә өзиниң йалғанчи икәнликини испатлиди" деди.

сот сентәбирдә һөкмини елан қилиду.

28йашлиқ александер 2017-йили 29-йанвар кубек сити ислам мәдәнийәт мәркизиниң җамәсигә хуптән намизи вақтида бесип кирип, намаз оқуватқан җамаәтни оққа тутқан иди. вәқәдә алтә киши җенидин айрилип, сәккиз киши йариланған иди.

һуҗумдин кейин сақчилар тәрипидин тутулған александер биссонетте дәсләптә җинайитини етирап қилмиған, әмма кейинчә җинайитини етирап қилип, алтә қетим биринчи дәриҗилик җинайәт өткүзүш вә алтә қетим җинайәт өткүзүшкә урунуш билән әйибләнгән иди.