7 dölet guruhi bashliqlar yighini axirlashti

türkiye awazi radiyosi xewiri: 7 dölet guruhi bashliqlar yighinida, amérika qoshma ishtatliri pirézidénti donald trampning kanada bash ministiri jastin trudugha bildürgen naraziliqi küchlük ghulghula qozghidi.

kanadada chaqirilghan 7 dölet guruhi bashliqlar yighini, amérikining yawropa ittipaqigha eza döletler, kanada we méksikidin import qilinidighan polat we alyumingha qoshumche baj qoyush qarari yüzisidin soghuq ötti. 7 dölet guruhi bashliqlar yighinining xulase doklatini kanada bash ministiri trudu oqudi؛ u trampni qattiq eyiblep, trampning soda toghrisidiki özgirishlerge bildürüwatqan pozitsiyesige qarimay, ikki künlük bashliqlar yighinining ünümlük ötkenlikini bildürdi.

xulase doklatida, hemmini öz ichige alidighan iqtisadiy éshishqa meblegh sélishqa yüzlinish, kélechekte tesiri küchlük bolidighan ish we kesiplerge teyyarliq qilish, jinsiy barawerlikni kücheytish qatarliqlargha ehmiyet bérilidighanliqi tekitlendi.

singapurda shimaliy koréye rehbiri kim jongun bilen ötküzülidighan yighin tüpeyli kanadadin burun ketken tramp, truduning özi toghrisidiki eyibleshlirige tiwittér adrési arqiliq jawab qayturdi. u, kanada bash ministirining sözlirini qattiq eyiblep, 7 dölet guruhi bashliqlar yighinining xulase doklatini imzalimaydighanliqini uqturdi.

donald tramp, truduni ikki yüzlimichilik we ajizliq bilen eyiblep, yéngi tamozhna bajlirini kanadaning amérika süt mehsulatlirigha qoyghan %270 lik tamozhna béjigha jawaben qoyghanliqini ilgiri sürdi.

truduning ishxanisidin bérilgen bayanatta bolsa, xulase doklatida otturigha qoyulghan mesililerning uningdin ilgiri trampqa qarshi hem jamaetchilikke ochuq hem mexsus uchrishishlarda otturigha qoyulghan mesililer ikenliki qeyt qilindi.