iran uran qoyuqlandurushqa teyyar ikenlikini jakarlidi

türkiye awazi radiyosi xewiri: iran atom énérgiyesi idarisi bashliqi eli ekber salihi, yuqiri sewiyelik uran qoyuqlandurush üchün teyyarliq xizmetlirining tamamlanghanliqini éytti.

iranning yérim resmiy xewer agéntliqi méhrning bu heqtiki xewirige asaslanghanda, eli ekber salihi bu heqte iran parlaméntigha qarashliq téxnika, telim-terbiye we tetqiqat komitétida parlamént ezalirigha melumat bergen.

yighin tügigendin kéyin bu heqte muxbirlarning soallirigha jawab bergen salihi, komitétqa yadro pirogrammilirini qaytidin bashlash üchün teyyar ikenliklirini bildürgenlikini dédi.

salihi irandiki yadro xizmetlirining 2015-yili tüzülgen yadro kélishimi dairiside ongushluq dawamlashqanliqini eskertip: eger yadro kélishimidin burunqi ehwalimizgha qaytishqa toghra kelse yaki yuqiri sewiyelik uran qoyuqlandurmaqchi bolsaq teyyarliqimizni qilip bolduq, lékin bundaq qilishqa mejbur bolup qalghimiz yoq, dédi.

amérika pirézidénti donald tramp, iran bilen birleshken döletler teshkilati xewpsizlik kéngishige eza döletler we gérmaniye arisida 2015-yili iyulda tüzülgen kélishimidin amérikini chékindürüp chiqip, téhrangha éghir émbargolarni qoyidighanliqini uqturghanidi.

iran yadro kélishimini dawamlashturush üchün kélishimge alaqidar tereplerdin washingiton hökümitining émbargolirigha qarshi tedbirlerni élishlirini telep qilimaqta.

amérika tashqi ishlar ministiri mayk pompéyomu bir nechche kün ilgiri, irangha «misli körülüp baqmighan pul-muamile bésimi we tarixtiki eng éghir émbargolarning»qoyolidighanliqini bildürgenidi.

iran bilen qaytidin yadro kélishimi tüzülüshi kéreklikini ilgiri sürgen pompéyo, iranning burunqi we hazirqi yadro qoralliri xizmetlirini xelqara atom énérgiyesi idarisigha doklat qilip, éghir su riaktorliri bolup barliq uran ishlepchiqirish xizmetlirini toxtitishi lazimliqini éytqanidi.

iran pirézidénti hesen ruhani pompéyoning bu sözlirige«sen kimting iran we dunya toghruluq qarar chiqiridighan» dégen mezmunda reddiye bergenidi.