ispaniye kataloniyening yéngi hökümitini étirap qilmidi

türkiye awazi radiyosi xewiri: ispaniye bash ministiri mariyano rajoy kataloniye aptonom rayonining yéngi pirézidénti kwim torra kabéntida musteqilliq paaliyetliri sewebidin tutulghan yaki qéchip ketken bezi sabiq ministirlargha orun bergendin kéyin, asasliq öktichi partiye hésablinidighan ispaniye sotsiyalist ishchi partiyesining reisi pédro sanchéz we merkiziy hökümetni sirttin qollighan wetendashlar partiyesining reisi albért riwéra bilen körüshti.

körüshüshte, kataloniye yéngi hökümitining kabéntida tutulghan yaki qéchip ketken bezi musteqil terepdari siyasetchilerning orun alghanliqi we ispaniye asasiy qanunining 155-maddisi boyiche kataloniye aptonom rayonini biwaste merkiziy hökümet teripidin bashqurush mesilisi muzakire qilindi.

kataloniyening yéngi pirézidénti torraning kabéntida musteqilliq paaliyetliri sewebidin tutulghan yaki qéchip ketken sabiq ministirlargha orun bergenlikige "yéngi ighwagerchilik" dep baha bergen ispaniye merkiziy hökümiti tünügün (20-may) bayanat élan qilip, yéngi kabént tizimlikining resmiy gézitte élan qilinmaydighanliqini uqturdi.

bayanatta, tizimlikni tekshürüshning dawamlishiwatqanliqi we merkiziy hökümetning testiqi bolmay turup kabéntning resmiyleshmeydighanliqi tekitlendi.

kataloniyening yéngi pirézidénti torra bolsa, sabiq ministirlarning hoquqini qayturup bérishning "zörüriyet" ikenlikini eskertip, kabént testiqlanmighan teqdirde "keng kölemlik organ kirizisliri" ning peyda bolushigha seweb bolidighanliqini ilgiri sürdi.

torra asasiy qanunning 155- maddisini ijra qilishning axirlashmighanliqini chüshengili bolmaydighanliqini bildürdi.

kataloniyening yéngi pirézidénti torra 17-may wezipisini bashlighan bolup, kabéntta türmidiki jordi turullu, joséf rul, bélgiyege qéchip ketken toni komin we luyis puégqa orun ajratqan idi.

musteqilliqni qollighan ötmüshi bolghan 55 yashliq torra, özini "waqitliq pirézidént", hoquqidin élip tashlanghan puigdémontni bolsa "qanunluq rehber" dep qaraydu. u qesem bérip wezipe tapshuruwélish murasimida, ispaniye bayriqi bilen padishah 6- filipning resimini asmighan idi. bu sewebtin merkiziy hökümet uni qattiq eyibligen idi.

ispaniye bash ministiri rajoy kataloniye hökümitining paaliyetlirini dawamliq közitidighanliqlirini we qanungha xilapliq qilishqa ruxset qilmaydighanliqlirini tekitlidi.