amérika ikkinchi flotini qayta quridu
amérika rusiye tehditige qarshi qurghan we 2011-yili emeldin qadurushtin burun atlantik okyanning shimalida wezipe ötewatqan ikkinchi déngiz flotini qayta eslige keltüridu.
türkiye awazi radiyosi xewiri: amérika déngiz armiyesi ikkinchi flot toghrisida bayanat élan qildi. bayanatta, déngiz armiye qomandani général jon richardsonning wirjiniyediki amérika déngiz flotliri qomandanliq merkizide ötküzülgen wezipe tapshuruwélish murasimida, ikkinchi flotning qayta qurulidighanliqini jakarlighanliqi bildürüldi.
bayanatta mundaq déyildi:
"ikkinchi flot amérikaning sherqiy sahili we atlantik okyanning shimalida wezipe öteydighan paraxot, ayropilan we déngiz armiye qisimliri üstidin herbiy we memuriy hoquq yürgüzidu."
bayanatta, ikkinchi flotning yüz bérish éhtimali bolghan dunyawi weqelerni kontrol qilish, déngizda herbiy heriket ijra qilish we déngiz armiye qisimlirini terbiyeleshte wezipe öteydighanliqi qeyt qilindi.
bayanatta, général richardsonning töwendiki sözlirige orun ajritildi:
"milliy mudapie rayoni we bixeterlik muhitining nahayiti murekkep bolushi shundaqla nahayiti qiyin halgha kélishi dawamlishiwatidu. bu bizning qayta chong küch riqabiti dewrige kirgenlikimizni ochuq otturigha qoyidu. shunga, bügün bolupmu shimaliy atlantiktiki özgirishlerge taqabil turush üchün ikkinchi flotni qayta qurimiz."
1950-yili qurulghan ikkinchi déngiz floti rusiyening yoshurun tehditining azayghanliqi seweb qilinip, sabiq pirézidént barak obama teripidin 2011-yili 30-séntebir emeldin qaldurulghan idi.
