пәләстин һөкүмити америкида чақирилған ғәззә йиғинини байқут қилди

түркийә авази радийоси хәвири: америка таратқулириниң хәвәр қилишичә, түнүгүн ақ сарайда чақирилған йиғинға, исраилийә, қатар, сәуди әрәбистан вә әрәб бирләшмә хәлипилики қатарлиқ 19 дөләтниң вәкили қатнашқан. әмма пәләстин һөкүмити америка қошма иштатлири пирезиденти доналд трампниң қуддус қарариға наразилиқ билдүрүп йиғинни байқут қилған һәмдә ғәззәгә алақидар музакириләргә қатнашмиған.

трампниң күйоғли җаред кашнев рийасәтчиликидә чақирилған вә кашнерниң хәлқаралиқ музакириләр ишлири алаһидә вәкили җейсен гринблет һәссә қошқан музакириләрниң мувәппәқийәтлик болуп болмиғанлиқи һәққидә мәлумат берилмиди. пәләстин һөкүмитиниң йиғинни байқут қилиши тоғрилиқму ақ сарай байанат елан қилмиди.

мәлуматларға қариғанда, кашнер иштиракчи дөләтләргә икки саәтлик доклат сунған, арқидин бу һәқтә музакириләр елип берилған йиғинға бәзи йавропа дөләтлириниң вәкиллириму қатнашқан.

исмини ашкарилашни халимиған бәзи америка даирилири  америка таратқулириға бәргән байанатлирида, йиғинниң исраилийә билән әрәб әллири оттурисида «биваситә сөһбәт» ни нишан қилидиғанлиқини билдүргән.

трамп 2017 – йили 6 – декабир күни елан қилған байанатида, қуддусни исраилийәниң пайтәхти дәп етирап қилидиғанлиқини уқтурған иди.

америка қошма иштатлири ташқи ишлар министирлиқи тәрипидин өткән ай елан қилинған байанатта, тел авивдики америка баш әлчиханисиниң май ейида қуддусқа йөткилидиғанлиқи билдүрүлүп мундақ дейилгән иди: «май ейида америка баш әлчиханисиниң қуддуста ечилишини пиланлаватимиз. баш әлчиханиниң ечилиши, исраилийә қурулғанлиқиниң 70 – йилиға тоғра келиду.»

пәләстин һөкүмити америка қошма иштатлириға қаттиқ наразилиқ билдүргән һәмдә вашингтонниң оттура шәрқ тинчлиқ мусаписидики мурәссәчилик ролини йоқатқанлиқини җакарлиған иди.