pelestin amérika bilen bolghan munasiwetlirini üzüp tashlidi
pelestin hakimiyiti pelestin azadliq teshkilatining washingitondiki qanunluq ruxsitining uzartilmasliqi sewebidin amérika bilen bolghan munasiwetlirini üzdi.
türkiye awazi radiyosi xewiri: pelestin hakimiyiti «pelestin azadliq teshkilatining washingitondiki ishxanisining qanunluq ruxsitining mudditining uzartilmasliqi»sewebidin amérika bilen bolghan barliq munasiwetlirini üzüp tashlidi.
pelestin hakimiyiti bilen munasiwiti yéqin bolghan bir emeldar mundaq dédi: «pelestin hakimiyiti pelestin azadliq teshkilatining ishxanisining taqiwétilishige qarita, amérikidiki barliq resmiy dairiler bilen bolghan munasiwitini üzdi.»
amérika dairiliri pelestin azadliq teshkilatining israiliye üstidin xelqara jinayiy ishlar mehkimisige sunghan erznamisini qayturuwwalmighan we israiliye bilen ötküzülidighan muzakirilerge qatnashmighan teqdirde, teshkilatning washingitondiki qanunluq salahiyitining élip tashlinidighanliqini we wakaletxanining qanunluq ruxsitining mudditining uzartilmaydighanliqini bildürgenidi.
pelestin azadliq teshkilati bash katipi seid ureykat amérika dairilirining bu qararigha qarita pelestin hakimiyitining pelestin azadliq teshkilatning washingitondiki ishxanisining qanunluq resmiyetliri yéngilanmighan ehwalda amérika bilen barliq munasiwetlerni üzüp tashlaydighanliqini uqturghanidi.
pelestin hakimiyiti 2015-yili aprélda xelqara jinayiy ishlar mehkimisige iltimas sunup, israiliyening 2008-yildin 2014-yilghiche ghezzege qilghan hujumliri bolup pelestinde sadir qilghan barliq depsendichilik qilmishlirining tekshürülüshini telep qilghanidi.
israiliye bilen pelestin arisidiki tinchliq muzakiriliri israiliyening «1967-yildiki chégralarni, mejburiy köchürüwétilgen pelestinliklerning yurt-makanlirigha qaytip kélishige ruxset qilishni we köchmen yehudilargha turalghu jay berpa qilish qurulushlirini toxtitishni qobul qilmasliqi»sewebidin 2014-yili aprélda toxtighanidi.
