b d t: arakan musulmanliri duch kéliwatqan kirizisni hel qilish söhbitide ilgirilesh yoq

birleshken döletler teshkilati birmida arakan musulmanliri duch kéliwatqan krizisni hel qilish we arakangha insanperwerlik yardem buyumlirini yetküzüp bérish söhbetliride héchqandaq ilgirilesh yoqluqini bildürdi.

840567
b d t: arakan musulmanliri duch kéliwatqan kirizisni hel qilish söhbitide ilgirilesh yoq

türkiye awazi radiyosi xewiri: birleshken döletler teshkilati bash katipining bayanatchisi stéphan dujarrich kündilik muxbirlarni kütiwélish yighinida qilghan sözide, arakan kirizisi we birma hökümiti bilen élip bériliwatqan söhbetlerge alaqidar soallargha jawab bergende mundaq dédi: «bu heqte ötküzülüwatqan söhbetlerde hazirghiche héchqandaq ilgirilesh hasil qilinalmidi. arakangha insanperwerlik yardem buyumlirini yetküzüp bérishke qanche tirishqan bolsaqmu, tolimu epsuski, muweppeq bolalmiduq. bumu ehwalning heqiqiy mahiyitini toluq eks ettürüp béridu.»

birmidiki zorawanliqtin qéchip bangladéshtin panahliq tileshke mejbur bolghan musapirlarning arakangha qaytalishi üchün ularning heq – hoquqlirining kapalet astigha élinishining zörürlükilini tekitligen dujarrich, arakan musulmanlirining öy – makanlirigha tinch we erkin – azade halda qaytishi lazimliqini qeyt qildi.

melumatlargha qarighanda, birma armiyesining qoralliq militanlargha qarshi küreshni ilgiri sürüp, arakanda puqralargha qarshi élip bériwatqan hujumlirida 25 – awghusttin buyan minglarche musulman hayatidin ayrilghan. birma hökümitining rayongha kirish – chiqishlargha ruxset qilmasliqi sewebidin hayatidin ayrilghan puqralarning sanini éniqlap chiqish mumkin emes iken. birma armiyesi bilen ashqun buddistlarning étnik tazilashqa aylinip ketken hujumlirida 300 gha yéqin yéza weyran bolghan, 600 mingdin artuq arakanliq musulman taghliq rayonlar, deryalar yaki déngiz arqiliq bangladéshqa qachqan bolup, qanche on minglighan musulman bangladéshqa qéchishning chare – tedbirliri üstide jiddiy izdenmekte iken.



مۇناسىۋەتلىك خەۋەرلەر