taylandning sabiq bash ministiri heqqide xelqaraliq tutush buyruqi chiqirilmaqchi

türkiye awazi radiyosi xewiri: tayland saqchi dairiliri, sabiq bash ministir yinglak shinawatrani tutush üchün xelqara saqchi teshkilati teripidin qizil bashliq höjjet chiqirilishini telep qildi.

yoqiri derijilik saqchi mesuli siriwara rangsibrahmanakul, «ereb birleshme xelipiliki dairiliri, sabiq bash ministir yinglakning dubeydin engliyege ketkenlikini bildürdi» dédi.

siriwara rangsibrahmanakul, buninggha qarita yekshenbe küni xelqara saqchi teshkilati teripidin yinglakning turushluq ornini éniqlash we tutush üchün qizil bashliq höjjet chiqirilishini telep qilghanliqini eskertti.

yinglak shinawatra 2014 -  yili 22 - mayda herbiy özgirish arqiliq wezipisidin élip tashlanghan we 5 yil siyasettin meniy qilinghan bolup, aldinqi ay taylandtin qéchip ketkenliki ilgiri sürülgen idi.

shinawatra 2011 - yili hakimiyet béshidiki chaghda déhqanlarning guruch ishlepchiqirishigha yardem qilish pirogrammisining tekshürülishini ayaq asti qilish bilen eyiblinip, özi qatnashmighan sotta 5 yilliq qamaq jazasigha höküm qilinghan idi.

deslepki mezgillerde bu yardem pirogrammisi déhqanlarning zor alqishigha érishken bolsimu, kéyinche wqitning ötüshige egiship, milyardlarche yawro ziyangha seweb bolghan idi.

pirogrammida sadir qilinghan xiyanet bayqalghanliqini bilip turup, aldini élish üchün héchqandaq heriket qilmasliq bilen eyiblengen shinawatra, bu eyibleshlerning hemmini ret qilghan idi.