gérmaniye omumiy saylimida mérkélning partiyesi üstünlükni igilidi
tünügün ötküzülgen gérmaniye omumiy saylimida bash ministir angéla mérkél rehberlikidiki xiristiyan démokratik birlik partiyesi bilen bawariye ölkisidiki qérindash partiye hésablinidighan xiristiyan sotsiyal birlik partiyesi ghelibe qildi.
türkiye awazi radiyosi xewiri: fédératsiye saylam orgini teripidin élan qilinghan muweqqet resmiy netijige qarighanda, xiristiyan birlik partiyeliri omumiy awazning %33 ini qolgha keltürüp, saylamda birinchi bolghan. biraq bu, 1949 – yilidin buyanqi saylamlarda mezkur ikki partiye qolgha keltürgen eng töwen awaz hésablinidiken. igilinishiche, xiristiyan démokratik birlik partiyesi bilen xiristiyan sotsiyal birlik partiyesi 2013 – yilidiki saylamlargha sélishturghanda, %8.5 chékinip ketken.
hökümetning shériki sotsiyal démokratik partiyemu aldinqi qétimliq saylamlargha sélishturghanda, %5.2 chékinip, %20.5 awazgha érishti. bu, sotsiyal démokratik partiyening tarixtiki eng az awazgha érishken saylimi bolup qaldi.
ashqun ongchi «gérmaniyening bashqa tallishi» partiyesi %12.6 awazgha ériship, tunji qétim fédératsiye parlaméntigha kirdi. gérmaniyening bashqa tallishi partiyesi, 2013 – yilidiki omumiy saylamda %4.7 awazgha ériship, %5 lik saylam ötkilining astida qalghanidi.
aldinqi qétimliq saylamda %4.8 lik awaz nisbiti bilen saylam ötkilidin ötelmigen erkin démokratlar partiyesimu bu saylamda %10.7 awazgha ériship, tötinchi boldi. %9.2 awazgha ériship beshinchi bolghan solchilar partiyesi bilen %8.9 awazgha érishken yéshillar partiyesi qaytidin parlaméntqa kirish salahiyitige érishti.
siyasiy partiyeler saylam netijisini bügün muhakime qilidu. bash ministir angéla mérkél bir téléwiziye qanilida söz qilip, yéngi hökümetning dékabir éyining otturilirighiche teshkillinip bolush éhtimali barliqini éytti.
matématikiliq nezer bilen qarighanda, hökümet teshkillesh üchün démokratik birlik partiyesi - xiristiyan sotsiyal birlik partiyesi - erkin démokratlar partiyesi – yéshillar partiyesi yaki démokratik birlik partiyesi - xiristiyan sotsiyal birlik partiyesi – sotsiyal démokratlar partiyesidek ikki xil éhtimalliqning barliqigha isharet qilghan mérkél, sotsiyal démokratlar partiyesining bashliqi martin shulizning birleshme hökümet qurush üchün muzakire ötküzüshke teyyar emeslikini melum qilghanliqini qeyt qildi. u yene, az sanliqlar hökümiti qurup chiqishqa qarshi ikenlikinimu sözlirige ilawe qildi.
