қатар әмири: вәзийитимиз бурунқиға селиштурғанда техиму йахши

қатар әмири шәйх тәмим бин һамад алсани дөлитиниң әһвалиниң парс қолтуқи йүз бәргән ийун ейидин бурунқиға селиштурғанда техиму йахши икәнликини әскәртти.

қатар әмири: вәзийитимиз бурунқиға селиштурғанда техиму йахши

түркийә авази радийоси хәвири: қатар әмири шәйх тәмим бин һамад алсани башчилиқида министирлар кеңиши йиғини чақирилди. қатар «QNA» агентлиқиниң хәвиригә асасланғанда, шәйх тәмим министирлар кеңиши йиғинида, киризис басқучида қатарниң вәзийити һәққидә тохталған.

 у: «һазирқи қатар биз үчүн вә һәммә киши үчүн ейтқанда 2017-йили ийун ейидин бурунқиға қариғанда көп охшимайду. иптихарлинидиған тарихимиз бар, бирақ 2017-йил ийун ейида йүз бәргәнләр бизни техиму күчләндүрди вә дөлитимиз үчүн техиму тиришип ишләшкә сәвәб болди» дегән.

у кейинки мәзгил вә қатарниң 2030-йиллиқ нишаниға қарап мувәппәқийәтлик һалда илгириләйдиғанлиқини, шуңа асасий тәрәққийат лайиһәлириниң бурунқидәк нормал сүрәттә, тәләп қилинған сүпәттә давамлишиши керәкликини билдүргән.

шәйх тәмим дөләт бихәтәрлики, иқтисад, йемәк-ичмәк вә тиббий саһәләрдә өзигә ишинишниң муһим икәнликини, кәлгүсидә диққәтни мәркәзләштүридиған мәсилиләрниң чики ишлар саһәсидики хизмәтләр билән иқтисад, бихәтәрлик, сәһийә вә маарип қатарлиқларда өз ара иттипақлиқни күчәйтиш икәнликини әскәрткән.

у парс қолтуқи киризисини һәл қилиш тоғрисида тохтилип, мундақ дегән:

«қатар парс қолтуқи киризисини дийалог билән һәл қилишқа тәййар. әгәр бир келишимни әмәлгә ашуруш үчүн тиришчанлиқ көрситилидиған болса уни мәҗбурий қобул қилдуруштин йирақ туруп, һәр қандақ бир дөләтниң ички ишлири вә игилик һоқуқиға дәхли-тәрүз қилиштин сақлинип, барлиқ тәрәпләрни өз ичигә елиши лазим.»

парс қолтуқи киризиси 5-ийул сәуди әрәбистан, әрәб бирләшмә хәлипилики, бәһрәйн вә мисир қатарлиқ дөләтләрниң қатар билән болған барлиқ мунасивәтлирини үзүши нәтиҗисидә партлиған иди. мәзкур төт дөләт мунасивәтләрниң нормаллишиши үчүн доһа һөкүмитигә 13 маддилиқ тәләп тизимликини сунған болуп, қатар буниңға қарита хәлқаралиқ қанунға хилап һәр қандақ тәләпни қобул қилмайдиғанлиқини елан қилған иди.



مۇناسىۋەتلىك خەۋەرلەر