әл қаидиниң бешиға усамә бин ладинниң оғлиниң келидиғанлиқи илгири сүрүлди

түркийә авази радийоси хәвири: террорлуқ тәшкилати әл қаидиниң сабиқ каттибеши усамә бин ладинниң оғли һәмзә бин ладинниң пат йеқинда тәшкилатниң каттибеши болидиғанлиқи илгири сүрүлди.

чәт әл таратқулири 28 йаштики һәмзә бин ладинниң тәшкилатниң каттибеши болуп террорлуқ тәшкилати даеш һалсириватқан бу мәзгилләрдә көзгә  көрүнүшни мәқсәт қилғанлиқини билдүрмәктә.

һәмзә бин ладин бултур тунҗи елан қилған ағзаки учурида сәуди әрәбистанни қаттиқ әйибләп бу дөләттә пәқәт «бөриләр»ниңла террорлуқ һуҗумлири садир қилишиға йолйуруқ бәргәниди.

бин ладин иккинчи қетилиқ ағзаки учурида сәуди әрәбистанниң қурғучиси абдуләзиз бин раһман әл суудни әнглийәниң җасоси болуш билән әйиблигәниди.

CBSхәвәр агентлиқиниң зийаритини қобул қилған америка ташқи ишлар министирлиқида ишләйдиған әли софан исимлик бир әмәлдар һәмзә бин ладинниң кичик вақтидила атисиниң избасири болалайдиған қабилийәтлик бала дәп қарилидиғанлиқини ейтип мундақ деди: «һәмзә бин ладин мундақ демәкчи: атамниң интиқамини чоқум алимән.»

игилинишичә, һәмзә бин ладинниң исми америка ташқи ишлар министирлиқиниң террорлуқ тизимликигә киргүзүлгән икән.

америка ташқи ишлар министирлиқида һазирму сақлиниватқан һәмзә бин ладинниң бир парчә хетидә һәмзиниң атиси усамә бин ладинниң интиқамини елиш койида икәнликини йазғанлиқи билдүрүлди.

террорлуқ тәшкилати әл қаидиниң каттибеши усамә бин ладин 2001-йили 11-сентәбирдә америкидики дунйа сода мәркизи билән мудапиә министирлиқи биналириға қилинған һуҗум вә  3миңдин артуқ кишиниң өлүминиң җавабкари, дәп қарилип кәлмәктә.

америка һакимийити усамә бин ладинни 2011-йили майда пакистанда елип берилған һәрбий һәрикәттә өлүк һалда қолға чүшүргәниди.