«amérika-rusiye munasiwitining hazirqi ehwali dunyagha ziyanliq»
amérika qoshma ishtatliri tashqi ishlar ministiri tilérson amérika-rusiye munasiwetlirining hazirqi ehwalining dunyagha paydiliq emeslikini bildürdi.
türkiye awazi radiyosi xewiri: amérika qoshma ishtatliri tashqi ishlar ministiri réks tilérson amérika-rusiye munasiwetlirining hazirqi ehwalining dunya we washingitonning menpeetlirige ziyanliq ikenlikini alahide eskertip ötti.
réks tilérson NBC télwiziye qanilining ziyaritini qobul qilip mundaq dédi: «nurghun kishining amérika-rusiye munasiwetlirining hazirqi ehwalining pütkül dunyagha nisbeten ziyanliq ikenlikini tonup yetkenlikini oylaymen. bolupmu amérikiliqlargha nisbeten dölet bixeterlikimiz üchün amérika-rusiye munasiwetlirining hazirqidek töwen sewiyede bolushi paydiliq emes. bu ehwalini özgertish üchün tiriship baqimiz.»
rusiye-amérika munasiwetlirining hazirqi ehwalini teriplesh üchün «nöl sewiyesige chüshüp qélish»ibarisining ishlitilishige qarshi ikenlikini éytqan tilérson sözini dawamlashturup mundaq dédi: «nöl sewiyesge chüshmeydu, ötmüshni inkar qilip munasiwetni qaytidin bashlash mumkin emes, biz qolimizdiki sehipilerdin bashlaymiz.»
réks tilérson «rusiyening bultur 8-noyabirda amérikida ötküzülgen pirézidéntliq saylamlirigha arilashqanliqigha jezm qilalaydighanliqini», biraq, rusiye-amérika munasiwetlirige téximu keng dairidin chiqish qilip qarash lazimliqini ilgiri sürdi.
öz waqtida amérikining barak obama bashchiliqidiki sabiq hakimiyiti rusiyeni amérikidiki pirézidéntliq saylamlirigha arilishish bilen eyibligenidi.
amérika awam palatasi bilen aliy palatasining istixbarat organliri hélihem rusiyening amérikidiki pirézidéntliq saylimigha ariliship arilashmighanliqi üstide tekshürüsh élip barmaqta.
rusiye bolsa amérika istixbarat organlirining eyibleshlirining asassiz ikenliki toghrisida köp qétim bayanat élan qildi.
