5-qétimliq süriye tinchliq yighini 23-mart échilidu
b d t (birleshken döletler teshkilati) süriye alahide wekili stifan démistura 5-qétimliq süriye tinchliq söhbitining 23-mart shiwéytsariyening jenwe shehiride ötküzülidighanliqini bildürdi.
türkiye awazi radiyosi xewiri: süriye alahide wekili démistura 4-qétimliq süriye tinchliq söhbiti axirlashqandin kéyin, b d t xewpsizlik kéngishige melumat berdi. u xewpsizlik kéngishidiki yighinini axirlashturup, muxbirlarni kütüwélish yighini ötküzdi. u jenwede toqquz kün dawamlashqan 4-qétimliq süriye tinchliq söhbitide «möjize» yüz bérishni kütmigenliklirini, biraq, héchqaysi terepning üsteldin ayrilmighanliqini we perez qilmighan ilgirileshlerning qolgha kelgenlikini éytti.
u tereplerning tunji qétim bir yerge kelgenlikini we hel qilish charisi tépish mesiliside estayidil bolghanliqini eskertti. u kéyinki qétimliq tinchliq söhbitide, hakimiyet, asasiy qanun basquchi, saylam we térrorluqqa qarshi küresh qatarliq mesililerning muhakime qilinidighanliqini bildürdi. u 5-qétimliq tinchliq söhbitining 23-mart bashlinidighanliqini bildürüp, muzakirelerning bir muddet biwaste emes, belki wastiliq élip bérilidighanliqini qeyt qildi.
qazaqistan paytexti astanada ötküzülidighan uchrishishlarda urush toxtitishqa xilapliq qilinghan hadisilerning muzakire qilinidighanliqini eskertken démistura, urush toxtitish küchlük shekilde ijra qilinmisa, tinchliq söhbetlirining ziyangha uchraydighanliqi toghrisida agahlandurdi. u astanadiki körüshüshlerge qatnashmaydighanliqini eskertti.
u türkiye, amérika we rusiyening ishtab bashliqlirining antalyada ötküzge uchrishishliri toghrisida toxtilip, üch terep uchrishishining térrorluqqa qarshi küresh üchün muhim ehmiyetke ige ikenlikini bildürdi.
