ereb elliri ittipaqi israiliyening ezanni cheklesh qanunigha qattiq naraziliq bildürdi

türkiye awazi radiyosi xewiri: ereb elliri ittipaqi israiliye parlaméntidiki qanun tüzüsh komitétining, ezanning mueyyen saetlerde yangratqu arqiliq oqulushini chekleshni mezmun qilghan qanun layihesini maqullishigha qattiq naraziliq bildürdi.

ereb elliri ittipaqi teripidin bu heqte élan qilinghan bayanatta mundaq déyildi: «ishghaliyetchi hökümetning ezan cheklimisini qanunlashturushini we buyruqwaz siyasitini qattiq eyibleymiz. bu siyaset rayonda ikki döletlik hel qilish charsi üstide ötküzüliwatqan söhbetlerge tesir körsitip, rayonni téximu qalaymiqanchiliqqa we muqimsizliqqa ittiridu.»

mezkur cheklimining aqiwetliridin israiliye hökümitini jawabkar tutqan ereb elliri ittipaqi, xelqarani israiliyege émbargo yürgüzüshke chaqirdi.

israiliyede radikal milletchi parlamént ezaliri teripidin teyyarlap chiqilghan we qanun chiqirish ishliri ministirliq komitétida aldinqi küni maqullanghan «bamdad namizining ezinini yangratqu arqiliq oqulushini chekleydighan»qanun teklipining, 15-féwral charshenbe küni israiliye parlaméntida maqullinishi kütülmekte.

«shawqun-sürenge seweb bolghanliqi» qarashliri sewebidin jamelerde yangratqu arqiliq ezan oqulushini chekleshni mezmun qilghan qanun layihesining, yolgha qoyulushi üchün israiliye parlaméntida üch kéngeshte awazgha qoyulushi kérek. pelestinlikler we islam dunyasining qattiq naraziliqini peyda qilghan bu qanun layihesi, buningdin ilgiri küntertipke kelgen bolsimu, israiliye parlaméntida awazgha qoyulmighanidi.