tramp resmiy wezipe öteshke bashlidi

türkiye awazi radiyosi xewiri: shuning bilen, u hem amérika tarixidiki yéshi eng chong pirézidént hem siyaset bilen shughullanmastinla 60 yashtin ashqanda wezipige olturghan tunji erbab bolup qaldi.

dölet mejliside aliy sot mehkimisining bash sotchisi jon robértning huzurida iljilge qolini qoyup turup qesem ichken tramp, adettin tashqiri derijidiki hayat hékayisi, teyyarliq saylamliridiki kütülmigen ghelibisi we choqum ishqa ashurimen dep bergen wediliri bilen hazirdin bashlapla amérikining siyasiy tarixidin tégishlik orun aldi.

amérikida 2016 – yili 1 – féwral küni ayéwédiki teyyarliq saylamliri bilen bashlanghan we 2016 – yili 8 – noyabirdiki pirézidént saylimi arqiliq axirlashqan riqabette, démokratlarning namzati, tejribilik reqibi sabiq tashqi ishlar ministiri hilari kilintonni arqida qaldurup, aq saraygha chiqish salahiyitige érishken tramp, siyaset bilen shughullanmighan bolushigha qarimay 60 yashtin ashqanda pirézidéntliq wezipisige olturghan tunji rehber unwanigha érishti.

shuning bilen u, pirézidéntliq wezipisige 70 yashqa toshqandin kéyin olturup, amérika tarixidiki yéshi eng chong pirézidént bolup qaldi.

bolupmu aq tenlik amérikiliqlarning qizghin qollishi netijiside  pirézidéntliq wezipisige olturush shan – sheripige érishken tramp, dölettiki otturihal tebiqidikilerning iqtisadiy ehwalini yaxshilashqa wede bérish arqiliq qollashqa érishti.

«amérikini qaytidin qudret tapquzayli!» shoari astida milyonlarche amérikiliqlargha «téximu güllengen bir dölet» berpa qilish toghruluq wede bergen tramp, bu nishanigha yétish üchün aldinqi pirézidént barak obama dewride chiqirilghan we «obamakeyr» dep atalghan sehiye islahati qanunini özgertidighanliqini, xitaygha oxshighan döletlerdin kélidighan mehsulatlardin téximu köp baj élish tüzümini yolgha qoyidighanliqini hemde pütkül xelqini hemishe amérikida ishlengen mehsulatlarni éstimal qilishqa we herqaysi karxanilargha amérikiliq ishchilarni ishlitishke teshwiq qilidighanliqini otturigha qoydi.

tramp dölet mejliside sözligen nutiqidimu bu heqte toxtalghanda, washingtondiki hakimiyet küchini qaytidin amérika xelqige tapshurushni nishan qiliwatqanliqlirini tekitlidi.

tégi gérmaniyelik karxanichi frédérik trampning newrisi bolghan donald tramp, 1946 – yili 14 – iyun küni niyu yorkta frédérik we mari maklod trampning 5 perzentining tötinchisi süpitide dunyagha kelgen.

öy – mülük sodigiri bolghan dadisiningmu teshwiq qilishi bilen yash waqtidin bashlapla öy – mülük dunyasigha qedem qoyghan tramp, 1968 – yili pénsilwaniye uniwérsitétining iqtisad bölümini püttürgen. dadisining shirkitige 1971 – yili xojayin bolghan tramp shirketni «tramp guruhi» dep atighan. shirketning merkizini manhatin rayonigha yötkigen tramp, méhmansaray qurulushliri bilen qisqa waqit ichide dang chiqirishqa bashlighan. 2014 – yili amérikining NBC  téléwiziye qanilida «shagirt» namliq pirogrammigha riyasetchilik qilishqa bashlighandin kéyin nami dunyagha port ketken. «‹ Forbes› zhurnili» ning 2016 – yilliq «dunya boyiche eng bay 400 shexs»  tizimlikige kirgüzülgen trampning 3.6 milyard dollar etrapida puli barliqi texminen qilinmaqta.

saylam riqabiti jeryanida bashtin – axir kona baj mesililiri talash - tartish témisi bolghan trampning yéqinqi 18 yildin buyan baj tölimigenliki ilgiri sürüldi.

igilinishiche, trampning hazirqi ayali silowéniyelik 46 yashliq kiyim - kéchek layiheligüchisi mélania tramp bolup, hazirghiche alghan üch ayalidin 3 i oghul, 2 si qiz bolup,  jemiy 5 balisi bar iken.