esed qisimliri helebtiki qozghilangchilar turiwatqan jaylarni qattiq bombardiman qildi

türkiye awazi radiyosi xewiri: süriyening heleb shehiride qozghilangchilar turiwatqan jaygha qilinghan hujumda 46 bigunah puqra hayatidin ayrilip, 230 kishi yaridar boldi.

helebke shiddetlik hujum bashlanghan 15 – noyabirdin buyan hayatidin ayrilghan puqralarning sani 935 ke yetti.

helebtiki puqralarni mudapie qilish guruppisi mudiri nejip ensari anadolu agéntliqigha bergen bayanatida, hökümet eskerliri we qullighuchi qisimlirining sherqiy helebtiki qozghilangchilarning kontirolluqidiki rayonlarni hem qurughluqtin, hem hawadin qattiq bombardiman qilghanliqini éytti. éghir bombardimanchiliq sewebidin bezi rayonlargha baralmighanliqini we sheherde insaniyetke xilap pajiening künsiri yamanliship kétip barghanliqini tekitlidi.

süriyening shimalida türkiye bilen chégralinip turidighan heleb wilayiti paytext demeshiqtin qalsila süriyening ikkinchi chong shehiri bolup, sheher merkizi türkiye chégrasidin aran 40 kélométir kélidu. hazir sheherde yüz minglighan bigunah puqra hökümet eskerlirining qorshawida turmaqta. bolupmu sherqiy helebtiki xelq 3 aydin köprek waqittin buyan  eqelliy turmush éhtiyajlirinimu qamdiyalmay kelmekte. 

yéqinqi 3 hepte ichide sheherning sherqiy qismidiki barliq doxturxanilar, sehiye merkezliri, tonur we mektepler hökümet qisimlirining shiddetlik hujumliri sewebidin weyran qliip tashlandi. barliq téléfon signali tarqitish süpilirining örüp tashlanghanliqi, hetta hökümet eskerlirining téléfot simlirni késip tashlighanliqi tüpeylidin rayon bilen alaqe ornitish asasen mumkin bolmay kelmekte. biraq bezide intayin cheklik halda éntérnit arqiliq alaqe ornitish mumkin bolidu.