amérika muawin pirézidénti: fethullahchilarning kattibéshini qoghdashqa héchqandaq sewebimiz yoq

amérika qoshma ishtatliri muawin pirézidénti jo baydin fethullahchi térrorluq teshkilatining kattibéshi gülleni qoghdashqa héchqandaq seweblirining yoqluqini éytti.

558942
amérika muawin pirézidénti: fethullahchilarning kattibéshini qoghdashqa héchqandaq sewebimiz yoq

türkiye awazi radiyosi xewiri: jumhur reis erdoghan dölet ishliri ziyaritide bolush üchün tünügün enqerege kelgen amérika muawin pirézidénti jo baydinni jumhur reislik sariyida qobul qildi.

erdoghan uchrishishtin kéyin ötküzülgen axbarat élan qilish yighinida, amérikidin fethullahchi térrorluq teshkilati unsurlirining kattibéshi fethullah gülenni türkiyege tapshurup bérishini alahide telep qilghanliqlirini tekitlep mundaq dédi: «bu mesilide amérika qoshma ishtatlirining bizning heqliq teleplirimizni qanduridighan shekilde qedem tashlaydighanliqigha ishinimen. daésh qatarliq térrorluq teshkilatlirigha qarshi küresh rayongha nisbeten eng muhim mesile. térrorluq teshkilatlirini yaxshi – yaman dep ikkige ayriyalmaymiz. milliy bixeterlikimizge tehdit sélinishigha esla yol qoyalmaymiz.»

amérika muawin pirézidénti jo baydin mundaq dédi: «fethullahchilarning kattibéshi gülenni qoghdashqa héchqandaq sewebimiz yoq. herbiy isyan urunushi yüz bergendin tartip hazirghiche sizni qollap kéliwatimiz. biz hemishe siz terepte turimiz. amérika herbiy isyan urunushi bilen chétishliqi bar barliq kishilerning sotqa tartilishi üchün türkiyege her jehettin yardem béridu. amérika xelqi siz terepte. herbiy isyan urunushi yüz bergen haman tunji qétim sizge téléfon qilghan rehber barak obama idi. kashki, burunraq türkiyede ziyarette bolsamchu! buning üchün türkiyedin kechürüm soraymen. gülenni türkiyege tapshurup bérish mesiliside hemkarliq asasida heriket qilidighanliqimizda qilche shübhe yoq. türkiye xelqi bilen amérika xelqi térrorizmgha qarshi küreshtin hergizmu waz kechmeydu.»

baydin  uchrishishliri dairiside erdoghan bilen körüshüshtin burun hemrahliqidiki heyet bilen birlikte  türkiye büyük millet mejlisini ziyaret qildi hemde parlamént bashliqi ismail qahraman bilen körüshti.

qahraman 15 – iyul herbiy isyan urunushidin kéyin türkiye hökümitini qollash meqsitide qilghan ziyariti üchün, dost we ittipaqdash dölet amérikining muawin pirézidénti baydingha rehmet éytti.

baydin herbiy isyan urunushidin tolimu epsuslinidighanliqini bildürüp mundaq dédi: «herbiy isyan urunushi yüz bergen künning etisila bu yerde bolushni arzu qildim. öz eskerliringlarning parlaméntqa hujum qilghanliqidin xewer tapqandin kéyin tolimu azablandim. bu weqe manga amérikidiki 11 – séntebir weqesini xatiriletti. biz türkiyening démokratiyesige ishinimiz. türkiye nahayiti küchlük dölet, bizning silerge éhtiyajimiz bar.»



مۇناسىۋەتلىك خەۋەرلەر