xitay bayanatchi ‹panama höjjetliri› ge dair soallargha jawab bermidi

türkiye awazi radiyosi xewiri: ashkarilanghan mexpiy höjjetlerde ilgiri sürülüshiche, rusiye pirézidénti wiladimir putin, argéntina pirézidénti makri, panama pirézidénti qatarliq 72 dölet erbabi, shundaqla xitay dölet reisi shi jinpingning qéyinakisi, xitayning sabiq bash ministiri li pingning qizi li shiyawlin qatarliq tonulghan kishiler chet döletlerde shirket échish arqiliq baj töleshtin özini qachurghan yaki bashqiche qilip éytqanda, baj oghrilighan.

‹panama höjjetliri› dégen namliq mezkur matériyalda özining yaki tughqanlirining ismi bar köpligen dölet erbabliri eyibleshlerni ret qilip bayanat berdi. bu nuqtida rusiye matériyallarni ashkarilghanlarning bezilirining zhurnalistlar emes, sabiq dölet bixeterlik jasusliri ikenlikini ilgiri sürüp qattiq naraziliq bildürdi.

ijtimaiy taratqularda tarqalghan xewerlerge asaslanghanda, bügün (5 – aprél) xitay tashqi shlar ministirliqining bayanatchisi xung lé axbarat élan qilish yighinida, chet el muxbirlirining panama höjjetliri toghrisidiki arqa – arqidin sorighan soallirigha «bu xil tutruqsiz, asassiz xewerler heqqide bir nerse dégüm yoq.» dep jawab bérish bilenla boldi qilghan.

xung léning bu sözliri chet el axbarat wastilirida keng tarqalghan bolsimu, xitay tashqi shlar ministirliqining tor békitide peqetla tilgha élinmighan .