kastro: amérika qosh ölchem yürgüzüp kelmekte
kuba pirizédénti kastro amérikining qosh ölchem yürgüzüp kéliwatqanliqini ilgiri sürdi.
türkiye awazi radiyosi xewiri: kubada ziyarette boliwatqan amérika qoshma ishtatliri pirizédénti barak obama, paytext hawanadiki inqilab sariyida pirizédént rawul kastro bilen körüshti.
uchrishishtin kéyin muxbirlarning soallirigha jawab bergen ikki lider, ikki dölet munasiwetlirini yaxshilash yolida tashlanghan qedemler üstide toxtaldi. obama ikki dölet otturisida roshen oxshimasliqlar we perqler bolsimu, kélechekke ümid bilen qaraydighanliqini alahide eskertip: «nöwette kelgüsige merkezliship, ikki dölet munasiwetlirini téximu kücheytish üchün dawamliq tirishchanliq körsitimiz.»
kubagha qaritilghan émbargolarning haman bir küni axirlishidighanliqini, biraq qachan axirlishidighanliqi toghrisida hazirche éniq bir nerse déyelmeydighanliqini tekitlgen amérika pirizédénti barak obama, émbargolarni bikar qilish süritining insan heqliri mesiliside saqliniwatqan mesililerning hel qilinish süritige baghliq ikenlikini eskertti.
kubaning kélechikini kuba xelqining özi belgileydighanliqinimu éytqan obama, kubagha yürgüzüp kéliniwatqan émbargo we yétim qaldurush siyasetlirining kargha kelmigenlikini bildürdi.
obama ikki döletning insan heqliri we démokratiye mesililirige perqliq muamile qilidighanliqlirini eslitip ötüp, kastro bilen ötküzgen söhbitide bu mesililer üstide tepsiliy toxtalghanliqlirini éytti.
kuba pirizédénti kastro insan heqliri mesiliside amérika qoshma ishtatlirining qosh ölchem yürgüzüp kéliwatqanliqini ilgiri sürdi. ikki dölet otturisida oxshimasliq we perqlerning bolushining normal ikenlikini éytqan kastro, dunya miqyasida héchqandaq bir döletning sehiye, maarip we barawer ish heqqi qatarliq mesililerge kapalet bérelmeydighanliqigha isharet qilip ötti.
«biz insan heqlirini yaqlaymiz»dégen kastro, obamagha oxshash ikki dölet munasiwetlirini kücheytish üchün tigishlik qedemlerni tashlaydighanliqigha wede bérip mundaq dédi: «bir köwrükni chuwup tashlash tolimu asan, biraq köwrükni qaytidin yasap chiqish tolimu müshkül we uzun waqit telep qilidighan ishtur.»
hemkarliq munasiwetlirini kücheytishte amérikining soda émbagolarni bikar qilishining tolimu muhim rol oynaydighanliqini eskertip ötken kastro, washingiton hakimiyitining guantanamoni tarqaqlashturup kubagha qayturup bérishining muhim rol oynaydighanliqini qeyt qildi.
kastro bu qedemler tashlansa nurghun nersining özgiridighanliqini éytip, obamaning bu jehettiki triishchanliqlirigha estayidil muamile qilidighanliqini éytti.
