kongre ezaliri: musulmanlar amérika jemiyitining bir parchisidur
amérika kongresining musulman ezaliri bolghan kéys élison we andri karson dölettiki musulmanlarning siyasetke téximu köngül bölüshi kéreklikini éytti.
türkiye awazi radiyosi xewiri: amérika kongresining ikki musulman ezasi mart éyining axirida dölitimiz jumhur reisi rejep tayyip erdoghan yupuqini achidighan amérika diyanet merkizide söz qildi we musulmanlarning amérika jemiyitining muhim bir parchisi ikenlikini tekitlidi.
minnésota ishtatidin saylanghan kongre ezasi we siyasetchi élison, musulmanlarning amérika jemiyitige teqdim qilalaydighan nurghunlighan muhim meniwi bayliqlirining barliqini we özliri yashawatqan rayonlarda siyasetke aktip ariliship, hökümet ichige kirishke tirishishi lazimliqini bildürdi.
indiyana ishtatidin saylanghan kongre ezasi andri karson sözide, musulmanlar üchün éytqanda, dölet tarixi nuqtisidin muhim basquchtin ötüwatqanliqlirini alahide eskertip, musulmanlarning siyasiy menide téximu mesuliyetchan bolushi kéreklikini qeyt qildi. u islamning amérikida eng téz tarqiliwatqan din ikenlikini bildürüp, mundaq dédi:
«11 – séntebir weqesidin kéyin, musulmanlargha siyasiy menide wekillik qilidighan héchkimning bolmasliqining bedilini, kéyinki künlerde nahayiti éniq köreliduq. amérikida texminen 8 milyon musulman bar, emma nahayiti epsuski ikki kongre ezasi bar. shunga, bu reqemni köpeytishimiz lazim. bizning siyasettin yiraq turidighangha charimiz yoq.»
yighinni teshkilligen türkiye musteqil soda – sanaetchiler jemiyiti (MÜSİAD) ning washingtondiki wekili ibrahim uyar: «musulmanlar amérika jemiyitining asasiy aktiyorliridin biri hésablinidu. bu oxshash waqitta yene, mesuliyet telep qilidu. musulmanlar islamgha qarshi teshwiqatqa nisbeten téximu yaxshi teshkillinip, küresh qilishi kérek» dédi.
