ہمارا ہدف 2053 تک زہریلی گیسوں کے اخراج کو صفر کرنا ہے: ایردوان
ماحولیاتی آلودگی کے خلاف جدوجہد کے معاملے میں ہمارا حتمی ہدف 2053 تک زہریلی گیسوں کے اخراج کو صفر کرنا ہے: صدر رجب طیب ایردوان

ترکیہ کے صدر رجب طیب ایردوان نے کہا ہے کہ ماحولیاتی تبدیلیوں کے خلاف جدوجہد میں ہمارا حتمی ہدف سال 2053 تک زہریلی گیسوں کے اخراج کو صفر کرنا ہے اور ہم اس ہدف کے حصول کے لئے تمام ضروری اقدامات کر رہے ہیں۔
صدر ایردوان نے اناطولیہ ایجنسی کی طرف سے استنبول میں منعقدہ ماحولیاتی فورم میں بذریعہ ویڈیو پیغام شرکت کی۔
پیغام میں انہوں نے کہا ہے کہ صنعت کے فروغ، ٹیکنالوجی کی ترقی اور انسانی عوامل کے ماحول پر اثرات نہایت سنجیدہ سطح پر خرابی کا سبب بن رہے ہیں اور ہر گزرتے سال میں عالمی سطح پر اس خرابی کے اثرات اور بھی شدت سے محسوس کئے جا رہے ہیں۔
صدر ایردوان نے کہا ہے کہ اگر بروقت اور کافی تدابیر اختیار نہ کی گئیں تو ماحولیاتی تباہیاں، فضائی آلودگی، آبی و غذائی سلامتی اور نباتاتی تنوع نقصان کی اس نقطے پر پہنچ جائے گا کہ جہاں اصلاح کا امکان نہیں رہے گا۔
انہوں نے کہا ہے کہ ایسے ممالک جو ماحول کو نسبتاً زیادہ نقصان پہنچا رہے ہیں انہیں نسبتاً زیادہ ذمہ داریوں کا بیڑہ اٹھانا چاہیے اور ماحولیاتی تبدیلیوں کے خلاف زیادہ کردار ادا کرنا چاہیے۔
انہوں نے حالیہ 20 سالوں میں فطرت اور ماحول کے تحفظ اور ماحولیاتی تبدیلیوں کے اثرات پر قابو پانے کے لئے ترکیہ کی طرف سے اٹھائے گئے تاریخی اقدامات کا ذکر کیا اور کہا ہے کہ "قابلِ تجدید توانائی کے شعبے میں ترکیہ یورپ بھر میں 5 ویں اور دنیا بھر میں 12 نمبر پر پہنچ گیا ہے۔ جنگلاتی اراضی کو 23 ملین ہیکٹر تک وسعت دے کر ہم یورپ میں سب سے زیادہ جنگلاتی اراضی کو فروغ دینے والا ملک بن گئے ہیں"۔
صدر ایردوان نے کہا ہے کہ "ہماری مقامی گاڑی TOGG بھی مکمل برقی گاڑی ہے۔ اس معاملے میں بھی ہم نے نہایت باشعور شکل میں اپنی ذمہ داری کو پورا کیا ہے۔ گذشتہ سال ہم نے قومی اسمبلی میں پیرس ماحولیاتی سمجھوتے کی بھی منظوری دی اور اس طرح ماحولیاتی تبدیلیوں کے خلاف اپنی جدوجہد کی رفتار میں قابلِ ذکر اضافہ کیا ہے۔
صدر رجب طیب ایردوان نے کہا ہے کہ ماحولیاتی آلودگی کے خلاف جدوجہد کے معاملے میں ہمارا حتمی ہدف 2053 تک زہریلی گیسوں کے اخراج کو صفر کرنا ہے اور اس ہدف تک رسائی کے لئے ہم تمام ضروری اقدامات کرناجاری رکھے ہوئے ہیں۔