پاکستان کی تاریخ میں ماہانہ ترسیلات کا نیا ریکارڈ قائم

بیرون ملک مقیم پاکستانیوں کی جانب سے اپریل کے مہینے میں 3.1 ارب ڈالر کی رقم پاکستان بھیجی گئی جو کسی ایک مہینے میں بھیجی جانے والی رقم کا ریکارڈ ہے۔

اسٹیٹ بینک آف پاکستان کا کہنا ہے کہ ملکی تاریخ میں پہلی بار ماہانہ ترسیلات 3 ارب سے زائد رہیں۔

اپریل میں بھیجی جانے والی ترسیلات زر گزشتہ سال اپریل کے مہینے کے مقابلے میں تقریباً 12 فیصد زیادہ ہیں۔

اسٹیٹ بینک کے مطابق اپریل کی ورکرز ترسیلات ریکارڈ 3 اعشاریہ 1 ارب ڈالر رہیں۔

مالی سال 22ء کے 10 ماہ کے دوران ترسیلات مجموعی طور پر 26.1 ارب ڈالر تک پہنچ گئیں جو گذشتہ سال کی اسی مدت کی نسبت7.6 فیصد زائد ہیں۔

اپریل 2022ء کے دوران سعودی عرب میں مقیم پاکستانیوں نے 70 کروڑ ڈالر بھیجے۔

متحدہ عرب امارات سے 61 کروڑ، برطانیہ سے 48 کروڑ اور امریکا سے 34 کروڑ ڈالر پاکستان بھیجے گئے ہیں۔

اسٹیٹ بینک کے مطابق 10 ماہ میں ورکرز ترسیلات 26.1 ارب ڈالر رہیں جو گزشتہ سال کی اسی مدت کی نسبت7.6 فیصد زائد ہیں۔

اپریل 2022ء کے دوران ترسیلات ماہ بہ ماہ 11.2 فیصد اور سال بسال 11.9 فیصد بڑھ گئیں۔

تجزیہ کاروں کے مطابق ترسیلات زر میں اضافہ خوش آئند ہے جس نے کسی حد تک ڈالر کے مقابلے میں پاکستانی روپے کو سہارا دیا ورنہ روپے کی سطح اور زیادہ کم ہوتی۔