داعش کی لیبیا سے تیونس داخل ہونے کی کوشش ناکام

لیبیا میں حالیہ چند ہفتوں سے جاری آپریشنز کے دوران مشکلات سے دو چار ہونے والی داعش نے اب اپنے دہشت گردوں کو تیونس منتقل کرنا شروع کر دیا ہے۔

تیونس کے لیبیا کی سرحدوں سے ملحقہ قصبے بن غویردان میں داعش کے حملے کے بعد جھڑپ ہوئی جس دوران تین شہری اور تین فوجی ہلاک ہو گئے ہیں۔

اس جھڑپ میں13 دہشت گرد بھی مارے گئے ہیں، باقی ماندہ کو واپس لیبیا جانے پر مجبور کر دیا گیا ہے۔

واضح رہے کہ تیونس کی جانب سے دہشت گردوں کے گزر کا سد باب کرنے کے لیے لیبیا کی سرحدوں پر 200 کلو میٹر طویل رکاوٹیں تعمیر کے باوجود دہشت گردوں کی سرحدوں کو پار کرنے کی کوششیں جاری ہیں۔

خیال ظاہر کیا جا رہا ہے کہ ہلاک شد گان دہشت گردوں میں تیونس میں گزشتہ موسم گرما میں 50 سیاحوں کے ہلاک ہونے والے دو دہشت گرد حملوں کے سرغنوں میں سے نورالدین چوچین بھی شامل ہے۔