بھارت: ریاست کیرالہ میں شدید بارشوں کے باعث اموات کی تعداد 358 ہو گئی

بھارتی ریاست کیرالہ میں شدید بارشوں کے باعث مٹی کے تودے گرنے سے ہلاک ہونے والوں کی تعداد 358 ہو گئی ہے۔

انڈیا ٹوڈے کے مطابق کیرالہ کے ریاستی حکام نے اعلان کیا کہ شدید بارشوں کے باعث مٹی کے تودے گرنے سے مرنے والوں کی تعداد 358 ہو گئی ہے۔

حکام نے اعلان کیا کہ متاثرہ علاقے میں اب بھی 200 سے زائد لاپتہ ہیں جبکہ امدادی کاروائیاں جاری ہیں۔

واضح رہے کہ بھارتی فوج نے ملبے تلے دبے افراد کو تلاش کرنے میں مدد کے لیے علاقے میں سرچ ریڈار بھیجے تھے۔

کانگریس پارٹی کے  رکن  ششی تھرور نے اپنے بیان میں کہا کہ انہوں نے بھارتی وزیر داخلہ امیت شاہ کو خط لکھ کر خطے میں لینڈ سلائیڈنگ کو قومی آفت قرار دینے کی تجویز پیش کی ہے۔

ریاست کیرالہ میں 30 جولائی کو ہونے والی شدید بارشوں کے نتیجے میں لینڈ سلائیڈنگ ہوئی اور انفراسٹرکچر اور سڑکوں کو شدید نقصان پہنچا۔

متاثرہ گاؤں چورال ملہ کے 200 گھر تباہ ہو گئے۔

بھارتی فوج نے اعلان کیا کہ یکم اگست کو 1500 فوجی متاثرہ علاقے میں تعینات کیے گئے تھے۔

آفت کی وجہ سے 8300 سے زیادہ لوگوں کو ریاست  کے ریلیف کیمپوں میں منتقل کیا گیا۔