بھارت  کااسلام آباد میں ہونے والی سارک کانفرنس میں شرکت سے انکار

بھارتی میڈیا نے دعویٰ کیا ہےکانفرنس میں نہ صرف بھارت بلکہ افغانستان، بنگلا دیش اوربھوٹان بھی شریک نہیں ہوں گے۔

578455
بھارت  کااسلام آباد میں ہونے والی سارک کانفرنس میں شرکت سے انکار

 

بھارت کے وزیراعظم نریندر مودی پاکستان میں ہونے والی سارک کانفرنس میں شرکت نہیں کریں گے۔

بھارتی وزارت خارجہ  نے اعلان کیا ہے کہ  وزیراعظم نریندر مودی  ماہ  نومبر میں اسلام آباد میں ہونے والی سارک کانفرنس میں شرکت نہیں کریں گے اوراس حوالے سے سارک کے موجودہ چیرمین نیپال کو آگاہ کردیا گیا ہے۔ وزارت خارجہ کا کہنا تھا کہ بھارت کے سارک کانفرنس میں شرکت کے لئے حالات سازگار نہیں جب کہ بھارتی میڈیا نے دعویٰ کیا ہےکانفرنس میں نہ صرف بھارت بلکہ افغانستان، بنگلا دیش اوربھوٹان بھی شریک نہیں ہوں گے۔

بھارتی میڈیا کا مزید کہنا تھا کہ وزیراعظم نریندرمودی نے سارک کانفرنس میں شرکت نہ کرنے کا فیصلہ اڑی سیکٹر میں فوجی ہیڈ کوارٹر پر حملے سے بہت پہلے کرلیا تھا۔

دوسری جانب پاکستانی دفتر خارجہ نے سارک کانفرنس میں بھارت کے شرکت نہ کرنے کے اعلان کو افسوسناک قرار دیتے ہوئے کہا ہےکہ بھارت کا سارک میں شرکت نہ کرنے کا فیصلہ بھارتی دفتر خارجہ کے ترجمان کے ٹویٹ سے پتا چلا تاہم بھارت نے ابھی تک اس حوالے سے سرکاری طور پر آگاہ نہیں کیا ہے ۔ ترجمان کا کہنا تھا کہ پاکستان خطے میں امن اور ترقی کے لیے پرعزم ہے۔

واضح رہے کہ 18 ستمبر کومقبوضہ کشمیر کے اڑی سیکٹر میں بھارتی فوج کے ہیڈ کوارٹر پر حملے کے نتیجے میں 18 فوجی ہلاک اور20 زخمی ہوگئے تھے اوراس کے بعد بھارت نے روایتی دشمنی کا مظاہرہ کرتے ہوئے اس کا الزام پاکستان پر عائد کردیا تھا۔



متعللقہ خبریں