رکن ممالک غزہ میں جنگ بندی کی حمایت کریں : گوتیرس

اقوام متحدہ کے سیکریٹری جنرل انتونیو گوتریس نے رکن ممالک پر زور دیا ہے کہ وہ غزہ میں مستقل جنگ بندی کی حمایت کریں، مجرموں کا احتساب کریں اور بحالی اور تعمیر نو کے لیے حالات پیدا کریں۔

انتونیو گوتریس اقوام متحدہ کی سلامتی کونسل کے ایک اعلیٰ سطحی اجلاس سے خطاب کر رہے تھے۔

انتونیو گوتریس نے کہا کہ مشرق وسطیٰ ایک گہری تبدیلی کے عمل سے گزر رہا ہے،یہ خطہ غیر یقینی صورتحال سے بھرا ہوا ہے لیکن اس میں مواقع بھی موجود ہیں، مشرق وسطیٰ کو نئی شکل دی جا رہی ہے لیکن ابھی تک یہ واضح نہیں ہے کہ اس عمل سے کیا نکلے گا۔

انتونیو گوتریس نے کہا کہ یہ یقینی بنانا ایک مشترکہ ذمہ داری ہے کہ مشرق وسطیٰ امن، وقار اور امید سے بھرپور افق کے ساتھ اس شورش زدہ دور سے نکل جائے۔

انتونیو گوتریس نے کہا کہ غزہ میں جنگ بندی اور قیدیوں کی رہائی سے متعلق معاہدے نے طویل عرصے بعد سکون    کا وسیلہ  فراہم کیاہے۔

اس بات کا ذکر کرتے ہوئے کہ 630 سے زیادہ انسانی امداد کے ٹرک غزہ پہنچ چکے ہیں ، انتونیو گوتریس نے اس بات پر زور دیا کہ فریقین کو معاہدے کی مکمل تعمیل کرنی چاہئے۔

انہوں نے کہاہمیں اس بات کو یقینی بنانا ہوگا کہ یہ معاہدہ تمام قیدیوں کو رہا کرے اور غزہ میں مستقل جنگ بندی کا باعث بنے۔

انتونیو گوتریس نے  کہا کہ اقوام متحدہ کے اداروں، خاص طور پر انروا  ایجنسی کے لیے ضروری ہے کہ وہ اپنی سرگرمیاں بلا روک ٹوک جاری رکھے، محفوظ ماحول میں امداد میں اضافہ کرے ، اسے ضرورت مندوں تک پہنچائے اور امن عامہ بحال کریں، اہم امداد تک رسائی فراہم کرے، بین الاقوامی مدد فراہم کرے اور شہریوں کی محفوظ واپسی کو یقینی بنائیں۔

اقوام متحدہ کے سیکرٹری جنرل نے کہا کہ میں اقوام متحدہ کی سلامتی کونسل اور تمام رکن ممالک سے مطالبہ کرتا ہوں کہ وہ غزہ میں جنگ بندی، لڑائی کے مستقل خاتمے، مجرموں کا احتساب اور بحالی اور تعمیر نو کے لیے  حمایت کریں۔