جوہری قوت میں مزید اضافہ کریں گے: کم یونگ اُن

شمالی کوریا کے سربراہ کم یونگ اُن کا کہنا ہے کہ ان کا ملک جوہری قوت کی تعمیر کے لیے ایک پالیسی پر عمل پیرا ہے تا کہ جوہری ہتھیاروں کی تعداد میں بڑا اضافہ کیا جا سکے۔

کوریا کی مرکزی خبر رساں ایجنسی کے مطابق ، کم یونگ ان نے یہ بات  گزشتہ  شب شمالی کوریا  کے یوم تاسیس کی یادگاری تقریب سے خطاب میں کہی۔

 کم یونگ ان  کا کہنا تھا کہ ہمیں  اپنی جوہری صلاحیتوں کو بڑھانا چاہیے اور ان کے استعمال کی تیاری کرنا چاہیے تا کہ ریاست کے  دفاعی  حقوق کی ضمانت دی جا سکے۔

شمالی کوریائی لیڈر نے واضح کیا کہ امریکہ اور اس کے چیلوں کی صورت میں موجود مختلف خطرات کا مقابلہ کرنے کے لیے مضبوط فوجی وجود کی ضرورت ہے۔

 دوسری جانب ،جنوبی کوریا کی وزارت دفاع آج  جزیرہ نما کوریا میں اقوام متحدہ کی قیادت میں شامل رکن ممالک کے ساتھ ایک اجلاس منعقد کرے گی۔

 واضح رہے کہ شمالی کوریا نے اقوام متحدہ کی مذکورہ قیادت پر تنقید کرتے ہوئے اسے غیر قانونی جنگی تنظیم قرار دیا تھا۔

 پیانگ یانگ حکومت نے دونوں ملکوں کی سرحد پر تعینات اقوام متحدہ کے زیر انتظام نگراں فورس میں جرمنی کی شمولیت پر نکتہ چینی کرتے ہوئے کہا ہے کہ اس پیش رفت سے کشیدگی جنم لے گی۔