امریکہ-جنوبی کوریا فوجی مشقیں خطرے کی گھنٹی بجا رہی ہیں:شمالی کوریا

شمالی کوریا نے خبردار کیا ہے کہ امریکہ کی جنگی مشقیں صورتحال کو  سرخ لکیر  کی انتہا پر لے جارہی ہیں۔

شمالی کوریا کی وزارت خارجہ کے ترجمان کی جانب سے جاری بیان میں کہا گیا ہے کہ امریکہ کی اتحادیوں کے ساتھ مشترکہ جنگی مشقیں  سرخ لکیر کی انتہا ہیں جس سے جزیرہ نما کوریا سنگین  جنگ کا شکار خطے میں تبدیل ہوسکتا ہے۔

ترجمان کا مزید کہنا تھا کہ جزیرہ نما کوریا کی سیاسی اور فوجی صورتحال تناؤ کی انتہا اور سرخ لکیر تک پہنچ چکی ہے جب تک امریکہ کے جارحانہ اور مخالفانہ اقدامات جاری رہیں گے مذاکرات ممکن نہیں ہیں۔

 شمالی کوریا امریکہ کی کسی بھی فوجی کارروائی کا سخت جواب دے گا جس میں جوہری طاقت کا استعمال بھی شامل ہے۔

امریکہ اور جنوبی کوریا کے اعلیٰ فوجی حکام نے گزشتہ ہفتے فوجی مشقوں کو مزید وسعت دینے اور خطے میں نئے جنگی بحری بیڑے اور بمبار طیارے تعینات کرنے کا فیصلہ کیا تھا۔

یاد رہے کہ  امریکی وزیر دفاع لائیڈ آسٹن نے تیس جنوری کو  اپنے دو روزہ دورہ  جنوبی کوریا کے دوران فوجی مشقوں کو مزید وسعت دینے اور خطے میں نئے جنگی بحری بیڑے اور بمبار طیارے تعینات کرنے کا فیصلہ کیا تھا۔