عرب امارات اور بحرین کا اسرائیل سے باضابطہ معاہدہ،واشنگٹن میں دستخط ہو گئے

امریکی صدر ڈونلڈ ٹرمپ نے گزشتہ روز وائٹ ہاؤس میں تقریب کی میزبانی کی جہاں گزشتہ ایک ماہ کے کم عرصے کے دوران متحدہ عرب امارات اور بحرین دونوں نے ہی اسرائیل سے تعلقات کی بحالی کا اعلان کیا تھا

1491506
عرب امارات اور بحرین کا اسرائیل سے باضابطہ معاہدہ،واشنگٹن میں دستخط ہو گئے

متحدہ عرب امارات اور بحرین نے اسرائیل سے تعلقات کی بحالی کے تاریخی معاہدے پر امریکہ میں صدر ڈونلڈ ٹرمپ کی موجودگی میں دستخط کر دیے۔

امریکی صدر ڈونلڈ ٹرمپ نے گزشتہ روز وائٹ ہاؤس میں تقریب کی میزبانی کی جہاں گزشتہ ایک ماہ کے کم عرصے کے دوران متحدہ عرب امارات اور بحرین دونوں نے ہی اسرائیل سے تعلقات کی بحالی کا اعلان کیا تھا۔

تقریب میں ٹرمپ کے ساتھ اسرائیلی وزیر اعظم بن یامین نیتن یاہو، متحدہ عرب امارات کے وزیر خارجہ شیخ عبداللہ بن زید النہیان اور بحرین کے وزیر خارجہ عبدالطیف الزیانی بھی موجود تھے۔

تقریب سے قبل نیتن یاہو سے اوول آفس میں ملاقات کے دوران ٹرمپ نے کہا کہ بہت جلد مزید پانچ سے چھ ملک ہمارے ساتھ مل جائیں گے تاہم انہوں نے ان ملکوں کے نام واضح نہیں کیے۔

وائٹ ہاوس کی بالکونی سے گفتگو کرتے ہوئے امریکی صدر نے کہا کہ ہم یہاں تاریخ کا دھارا بدلنے کے لیے جمع ہوئے ہیں اور اسے اہم تبدیلی قرار دیا جس میں اب تمام عقائد کے لوگ امن اور خوش حالی کے ساتھ رہ سکیں گے۔

ان کا کہنا تھا کہ اب مشرق وسطیٰ کے تین ممالک مل کر کام کریں گے، اب یہ دوست ہیں، ان تین ملکوں کی قیادت کی جرات و ہمت کا شکر گزار ہوں اور کچھ دیر میں یہ رہنما معاہدے پر دستخط کرنے والے ہیں۔

انہوں نے کہا کہ کئی دہائیوں کی تقسیم اور تنازعات کے بعد نئے مشرق وسطیٰ کا سورج طلوع ہو رہا ہے۔

ٹرمپ نے کہا کہ اب تک کئی دہائیوں میں اسرائیل کے صرف دو ملکوں سے اس طرح کے معاہدے ہوئے تھے لیکن ہم نے محض ایک ماہ میں ایسے دو معاہدے کر لیے اور ابھی اس طرح کے مزید معاہدے بھی ہوں گے۔

اپنے خطاب کو جاری رکھتے ہوئے امریکی صدر نے کہا کہ اسرائیل، بحرین اور متحدہ عرب امارات اب ایک دوسرے کے ملک میں سفارت خانے بنا سکیں گے، سفارت کاروں کا تبادلہ کر سکیں گے اور سیاحت، تجارت، سیکیورٹی، ٹیکنالوجی سے لے کر صحت کے شعبے تک ایک دوسرے سے تعاون کر سکیں گے۔

ان کا کہنا تھا کہ اس معاہدے کی بدولت دنیا بھر کے مسلمان اسرائیل میں مسجد اقصیٰ اور القدس سمیت تاریخی مقامات کا دورہ بھی کر سکیں گے۔

واضح رہے کہ یہ دونوں معاہدے امریکی صدر کے لیے اہم سفارتی کامیابیاں ہیں اور آنے والے  صدارتی انتخابات میں ان کے لیے مددگار ثابت ہو سکتے ہیں۔

متحدہ عرب امرات اور بحرین اسرائیل کو تسلیم کرنے والے بالترتیب تیسرے اور چوتھے عرب ملک بن گئے ہیں جہاں اس سے قبل 1979 میں مصر اور 1994 میں اردن نے اسرائیل سے تعلقات بحال کر لیے تھے۔



متعللقہ خبریں