آذربایجان: زنگه‌زور کریدوری نینگ آچیلماغی اۆچین ارمنیستان بیلن ایلالاشدیق
الهام علی یف تۆرکیأنینگ جمهورباشلیغی رجب طیب أردوُغان بیلن تلفن آرقالی دوشوشیق گچیردی
آذربایجان ینگ جمهورباشلیغی الهام علی یف هم دمیریوُلی هم ده قوری یردن زنگه زور کریدوری نینگ آچیلماغی باراسیندا ایلالاشاندیقلارینی بیلدیردی.
علی یف تۆرکیأنینگ جمهورباشلیغی رجب طیب أردوُغان بیلن تلفن آرقالی دوشوشیق گچیردی.
آذربایجان ینگ یوُلباشچیسی بو دوشوشیقدا؛ اوروپا بیله له شیگی نینگ گنگه شی نینگ باشلیغی چارلز میشل و ارمنیستان ینگ باش وزیری نیکول پاشینیان بیلن بلژیک دأکی گپله‌شیکلری حاقیندا ماغلومات بردی.
میشل و پاشینیان بیلن آذربایجان- ارمنیستان آراسینداقی پاراحاتچیلیق ایلالاشیغی نینگ طایارلانماغی، ایکی یوردونگ آراقاتناشیغی نینگ عاداتی یاغدایا اؤورۆلمه‌گی، قاتناو کریدوری نینگ آچیلماغی و سرحتلرینگ بِللی ادیلمه گی باراسینداقی مسئله لر حاقیندا گپله‌شیلندیگینی آیدان الهام علی یف، دوشوشیغینگ قوُوی گچندیگینی نیغتادی.
دۆین آذربایجان بیلن ارمنیستان ینگ آراسیندا سرحتلرینگ بِلله‌نمِه‌گی باراسیندا دؤولت کمیسیونی نینگ قورالماغی باراداقی قارارا قوُل چکندیگینی یاتلادان علی یف، تاراپلارینگ هم دمیریوُلی هم ده قوری یر یوُللاری نینگ سالینماغی باشدا بوُلماق بیلن زنگه زور کریدوری نینگ آچیلماغی مسئله سینده ایلالاشاندیقلارینی حابار بردی.
أردوُغان دا برن ماغلوماتلاری اۆچین علی یووا ساغ بوُلسون آیتدی و آلینان نتیجه لره بگنچ بیلدیردی.
بؤلگه ده اینگ چالت یاغدایدا پاراحاتچیلیغینگ یوُلا قوُیولماغی نینگ أهمیتینه اۆنس چکن أردوُغان و علی یف تۆرکیه بیلن آذربایجان ینگ آراقاتناشیغی باراسیندا دا گنگه‌شدیلر.
