Çawuşogly: "Ermenistan bu kyn günümizde bize dostluk elini uzatdy" diýdi

Daşary işler ministri Mewlüt Çawuşogly, Ermenistanyň Daşary işler ministri Ararat Mirzoýan bilen paýtagt Ankara şäherindäki Daşary işler ministrliginde geçirilen duşuşykdan soň, umumy metbugat ýygnagynda söz sözledi. 

Ýer titremelerden soň, Ermenistanyň Türkiyä 28 adamdan ybarat gözleg we halas ediş toparyny ugradandygyny aýdan Mewlüt Çawuşogly, Ermenistan toparynyň 8-nji fewraldan bäri Adyýaman welaýatynda arman-ýadaman iş alyp barýandygyny mälim etdi. 

Mewlüt Çawuşogly, Ermenistanyň gözleg we halas ediş toparynyň bir kiçijek gyzy we bir zenany halas edendigini belläp: "Olarada örän minnetdarlyk bildirmek isleýärin. Hakykatdan hem arman-ýadaman iş alyp bardylar we raýatlarymyzy halas eden mahallary hem örän bagtyýar bolandyklaryny gördük" diýip mälim etdi. 

Ermenistanyň Türkiyä 100 tonnalyk ynsanperwer kömek ugradandygyny, kärdeşi Mirzoýanyň şu gün geçirilen duşuşykda hem goşmaça kömekler ugratjakdyklaryny aýdandygyny bellän Mewlüt Çawuşogly, Ermenistanyň Türkiyeden goşmaça islegleriniň bolup-bolmandygyny sorandygyny beýan etdi. 

Çawuşogly: "Ermenistan bu jyn günümizde dostluk elini uzatdy, raýdaşlyk we hyzmatdaşlyk ýüzlenmesini berdi" diýip, Ermenistanyň 1999-njy ýylda başdan geçirilen Göljük ýer titremesinden soň hem Türkiyä ynsanperwer kömek ugradandygyny ýatlatdy. 

Ermenistanyň Daşary işler ministri Mirzoýan hem: "Bu kyn pursatlarda Türkiýä sapar gurap, ýene-de bir gezek parahatçylygy ýola goýmak baradaky islegimizi tassyklamak isleýärin" diýip nygtady. 

Kahramanmaraş welaýatynda geçen hepde başdan geçirilen we ýurduň 10 welaýatyna täsir ýetiren 7,7 we 7,6 bal ululygyndaky ýer titremelerde ençeme müň adam ýogaldy, tebigy apat "Asyryň Betbagtçylygy" hökmünde häsýetlendirilýär.