Türkiýe magdan eksporty boýunça rekord goýdy

Energetika we tebigy serişdeler ministri Fatih Dönmez, magdan eksportynyň geçen 2021-nji ýylda ondan öňki 2020-njy ýyla garanyňda 40 göterim artandygyny belläp: "Geçen ýyl respublika taryhynyň rekordyny goýup 5 milliard 930 million dollarlyk magdan eksport edildi" diýip habar berdi. 

Energetika we tebigy serişdeler ministri Fatih Dönmez, 2021-nji ýyl Magdan eksportynyň netijelendirme maslahatynda eden çykyşynda, geçen ýylyň energetika we magdan pudagy taýdan üstünlikli tamamlanandygyny mälim etdi. 

2021-nji ýylda altyn boýunça 7,6 milliard dollarlyk eksportyň, 5,6 milliard dollarlyk impordyň amala aşyrylandygyny aýdan Dönmez, 2009-njy ýylda 11 milliard lira bolan magdan pudagynyň Jemi içerki önüme goşan goşandynyň 2020-nji ýylda takmynan 6 esse artyp, 59,2 milliard lira ýetendigine ünsleri çekdi. 

Magdan pudagynyň 2000-nji ýylda 565 million dollar bolandygyny ýatladan Dönmez: "Geçen ýyl respublika taryhynyň rekordyny goýup 5 milliard 930 million dollarlyk magdan eksport edildi. 20 ýylda 10 esseden gowrak artyş hasaba alyndy. 2020-nji ýyldaky 4 milliard 270 million dollarlyk magdan eksporty bilen deňeşdirenimizde bolsa ýyllyk çäkde 40 göterimlik artyş hasaba aldyk" diýip habar berdi. 

Dönmez geçen ýyl magdan eksport sanawynyň ilkinji 10-lugynda Hytaý, ABŞ, Ispaniýa, Bolgariýa, Belgiýa, Italiýa, Hindistan, Şwesiýa, Germaniýa, Fransiýa ýaly ýurtlaryň bardygyny, şu ýyl bolsa Indoneziýa, Özbegistan, Gonkong, Albaniýa we Serbiýa ýaly ýurtlaryň sanawa goşulandygyny aýan etdi.