Türk metbugatynyň gysgaça mazmuny
Ýurduň we dünýäniň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Hürriýet” gazeti “Türkiýe bilen Kataryň arasynda möhüm ylalaşyklara gol çekişildi” söz başyly habarynda, Prezident R.T.Erdoganyn düýn Türkiýä sapar bilen gelen Kataryň Emiri Şeýh Tamim Ben Hamad Al Sanini resmi dabara bilen garşy alandygyny ýazýar. Gazet Erdogan bilen Al Saniniň Prezidentiň kompleksinde özara we toparara duşuşyklardan soň iki ýurduň arasynda 10 ylalaşyga dabara bilen gol çekişilendigini mälim edýär.
“Star” gazeti “Oktaý: Palestina meselesinde bir pozisiýa eýelenmeli” söz başyly habarynda, Prezidentiň orunbasary Fuat Oktaýyň düýn koronawirus sebäpli onlaýn geçirilen Yslam Hyzmatdaşlyk Guramasynyň Ykdysady we Söwda Hyzmatdaşlygy Boýunça Hemişelik Komitetiniň 36-njy maslahatynyň soňky bölümine gatnaşyp, “Palestina meselesinde bir pozisiýa eýelenmeli. Şol sebäpli palestinaly doganlarymyzyn we yslam ummadynyň garaşýan başlangyçlary dessine iş ýüzüne geçirilmeli” diýendigini okyjy köpçüliginiň dykgatyna ýetirýär.
“Watan” gazeti “Mejlisiň Başlygy Şentop: BMG esasy missiýalaryny berjaý etmekden iňňän daşda” söz başyly habarynda, Türkiýäniň Mejlisiniň Başlygy Mustafa Şentopyň düýn beren beýannamasynda halkara guramalarynyň käbirleriniň, esasanda BMG-niň esaslanýan missiýalaryny ýerine ýetirmekden iňňän daşdadygyny belläp: “Halkara guramalarynyň diňe bir belli ýurtlaryň bähbitlerine däl, eýsem bütin adamzadyň bähbitlerine hyzmat etmelidigini we şol ugurda düýpli özgertmeleriň edilmeliginiň möhümdigine ynanýaryn” diýendigini mälim edýär.
“Haber Türk” gazeti “Ministr Akar Fransiýa Daglyk Garabag meselesinde reaksiýa bildirdi” söz başyly habarynda, Milli goranmak ministri Hulusi Akaryň Fransiýanyň Senatynyň “Daglyk Garabag Respublikasyny” ykrar etmek hakyndaky rezolýusiýasyna reaksiýa bildirip: “Fransiýa ÝHHG-niň Minsk toparynyň egindeş başlygy hökmünde tarapsyz çemeleşmeli. Şol karar bolsa onuň beýle däldigini, Fransiýa Garabag meselesinde çözgüt däl, eýsem meseläniň bir bölegini emele getirýändigini ýene-de bir gezek görkezdi” diýen sözlerine üns çekilýär.
“Ýeni Şafak” gazeti “Ministr Soýlu ilkinji gezek beýan etdi: Taryhyň iň aşak sany” söz başyly habarynda, Içeri işler ministri Süleýman Soýlunyň düýn beren beýannamasynda: “Türkiýe şu günki günde terrorçylyga garşy göreşde uly üstünlik gazandy. Häzirki sany dykgatyňyza ýetirýärin. Häzirki wagtda ýurduň içindäki terrorçylaryň sany 320-ä düşdi. Bu san taryhyň iň aşak sany” diýen sözlerini okyjy köpçüliginiň dykgatyna ýetirýär.
