Türk metbugatynyň gysgaça mazmuny
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
Hürriýet gazedi: “Asyryň meýilnamasyna garşy Prezident Erdogandan berk reaksiýa” söz başyly habarynda, Türkiýäniň Prezidenti R.T. Erdoganyň, Malaýziýanyň paýtagty Kula-Lumpur şäherinde “Ysraýylyň basyp alyjylygyny bes etdirjek täsirli bir strategiýa tarap” temasy bilen geçirilýän Parlamentara Iýerusalim platformasyna bir hat ugradyp, ABŞ-nyň hökümetiniň birtaraplaýyn Ýakyn Gündogar meýilnamasyna reaksiýa bildirendigini habar berýär. Prezident Erdogan ýüzlenmesinde: “Dünýäniň gün tertibine toslama Asyryň meýilnamasy ady bilen tanalýan we Iýerusalimi Ysraýylyň paýtagty yglan eden meýilnama, sebitiň parahatçylygyna we asudalygyna howp abandyrjak bir hyýaldan başga bir zat däldir. Bu hyýalyň durmuşa geçirilmegine rugsat bermeris” diýip belledi.
Watan gazedi: “Basyp alyjylyk meýilnamasyna garşy Italiýadan Türkiýä garaşylmadyk teklip” söz başyly habarynda, Italiýanyň Wekiller mejlisiniň deputaty Mişel Pirasyň, Malaýziýadaky konferensiýada eden çykyşynda: “Türkiýe we Italiýa ABŞ-nyň Prezidenti Donald Trampyň toslama parahatçylyk meýilnamasyna garşy Palestina üçin başga bir parahatçylyk meýilnamasyny taýarlap biler” diýendigini beýan edýär.
Star gazedi: “Türkiýe 3-nji buraw gämisine gowuşdy” söz başyly habarynda, Türkiýäniň Nebitleri anonim hyzmatdaşlygy kärhanasynyň (TPAO), Gündogar Ortaýer deňizinde ulanjak 3-nji buraw gämisini auksion arkaly alandygyny aýan edýär. TPAO kärhanasy 3-nji gämini Britaniýada geçirilen auksionda 37,5 million dollara satyn aldy.
Sabah gazedi: “Ministr Warank 4-nji Milli Antarktida Ylmy sapar üçin ýola çykan topary ugratdy” söz başyly habarynda, Senagat we tehnologiýa ministri Mustafa Warankyň, 4-nji Milli Antarktida Ylmy sapar üçin ýola çykjak topary Stambul howa menzilinde geçirilen dabara bilen ugradandygyny mälim edýär. Warank, ylmy saparda alynjak maglumatlaryň halkara ylmy neşirler bilen bütin dünýä açyljakdygyny belläp: “Saparymyzyň çägindäki ylmy-derňewleriň saýasynda materikdäki fiziki barlygymyz has hem güýçlener, Türk Antarktida ylmy baza işlerinde soňky tapgyra geliner” diýip belledi.
Ýeni Şafak gazedi: “Goýum banky boýunça Türkiýe möhüm bir merkez” söz başyly habarynda, Yslam banklary we maliýe guramalaryň Baş geňeşiniň Baş sekretary Abdelilah Belatik, Türkiýäniň Goýum banky taýdan möhüm bir bazardygyny aýdandygyny okyjy köpçüliginiň dykgatyna ýetirýär. Belatik: “Türkiýe öz mümkinçilikleri we soň bolsa tiz depginler bilen özgerýän Aziýa bazarlaryna girmek taýdan örän möhüm bir merkez” diýip nygtady.
