Türk metbugatynyň gysgaça mazmuny

Haber Türk gazedi: “Erdogan: Terror koridoryny dargatdyk” söz başyly habarynda, 29-njy oktýabr Respublika baýramy Türkiýäniň ençeme ýerinde bellenilip geçilendigini habar berýär. Ýaşlardan ýaşulylara çenli halkyň ähli ýaş gatlagy dabaralara gatnaşdy. Prezident Rejep Taýýip Erdogan, ýanyndaky hökümetiň agzalary bilen bilelikde Respublika baýramy mynasybetli Anytkabiri zyýarat etdi. Prezident Erdogan Anytkabiriň ýörite depderine: “Parahatçylyk Çeşmesi operasiýasy bilen Siriýa serhedimiz boýunça döredilmek islenen terror koridoryny dargadyp, tutanýerliligimizi ýene-de bir gezek bütin dünýä görkezdik” diýip ýazdy.

Hürriýet gazedi: “Halk Anytkabiri doldurdy” söz başyly habarynda, Respublikanyň 96 ýyllygy mynasybetli raýatlar düýn Anytkabiri doldurandygyny mälim edýär. Türkiýäniň çar tarapyndan gelen myhmanlar, Atatürkiň mawzoleýine gül desselerini goýdylar, Anytkabir muzeýine gezelenç etdiler. Türkiýäniň baýdagy we gyzyl-ak reňkdäki egin-eşikleri bilen, Atatürkiň aramgähine gelen okuwçylar, çagaly maşgalalar we ýaşuly adamlar, Gazy Mustafa Kemal Atatürkiň guburyna gül desselerini goýdylar. Respublika baýramy mynasybetli şu gün mawzoleýe gelen 7 ýaşdan 70 ýaşa çenli adamlar Anytkabiri we onuň töweregini doldurdylar. Anytkabir harby serkedeliginde gulluk edýän esgerleriň nobat çalşygy hem gelen myhmanlaryň ünsüni özüne çekdi. Adamlar ol ýerde ýadygärlik surata düşdiler.

Watan gazedi: “Türkiýeden ABŞ-nyň sanksiýa kararyna reaksiýa” söz başyly habarynda, Türkiýäniň, ABŞ-nyň Wekiller palatasynda Siriýanyň demirgazygynda ekstremist terror guramasy ÝPG/PKK/SDG we DAIŞ-e garşy geçirilýän Parahatçylyk Çeşmesi operasiýasy delil görkezilip, Türkiýä garşy sanksiýalar girizmek bilen bagly kanun taslamasynyň kabul edilmegini berk ýagdaýda ýazgarandygyny aýan edýär. Daşary işler ministrliginden mesele bilen bagly berilen beýanatda: “Parahatçylyk Çeşmesi operasiýasy delil görkezilip, ýurdumyza garşy sanksiýa goýulmagyny öz içinde jemleýän bir kanun taslamasynyň şu gün ABŞ-nyň Wekiller mejlisinde kabul edilmegini berk ýagdaýda ýazgarýarys” diýip bellendi. Türkiýede ýokary derejeli resmileri we Ýaragly güýçlerini nyşana alan kanun taslamasynyň, NATO-nyň çäginde alynyp barylýan hyzmatdaşlyk ruhuna bap gelmeýändigi bellenen beýanatda, 17-nji oktýabrda Siriýa babatynda ABŞ bilen baglaşylan ylalaşygyň düzgünlerine hem ters gelýändigi habar berildi.

Sabah gazedi: “Daşary işler ministrligi: ABŞ-nyň Wekiller palatasynyň kararyny ret edýäris” söz başyly habarynda, Türkiýäniň ABŞ-nyň Wekiller palatasynyň kabul eden ermeni garaýyşlary bilen bagly kararyny berk ýagdaýda ýazgarandygyny okyjy köpçüliginiň dykgatyna ýetirýär. Daşary işler mnistrligi: “Wekiller palatasynda düýn kabul edilen karary ret edýäris” diýip beýan edildi.

Star gazedi: “Dynç alan daşary ýurtlylar Antalýa ýerleşdiler” söz başyly habarynda, Türkiýäniň syýahatçylyk jennedi Antalýanyň ýaşaýyş jaý satuwynda hem rekorda tarap barýandygyny mälim edýär. Antalýa welaýatynda daşary ýurtlylara satylan ýaşaýyş jaýlaryň sany şu ýylyň ilkinji 9 aýynda 6 müň 257 bolan bolsa, daşary ýurtlylara satylan jaýlaryň sany 2018-nji ýylyň şol döwri bilen deňeşdirilende 19 göterimlik artyş bellige alyndy. Derejäniň şu ýylyň ahyryna çenli 10 müňe ýetip, rekord goýulmagyna garaşylýar.