Türk metbugatynyň gysgaça mazmuny
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Sabah” gazeti “Ministr Warank: 20 ýyllyk hyýal hakykata öwrüldi” söz başyly habarynda, Prezidentiň Permany bilen Türkiýäniň Kosmos gullugynň döredilmegi baradaky kararyň Resmi gazetde çap edilendigini ýazýar. Gazet Senagat we tehnologiýa ministri Mustafa Warankyň kosmos tehnologiýalar boýunça syýsatlary we strategiýalary kesgitlejek Türkiýäniň Kosmos gullugynyň döredilmegi bilen 20 ýyllyk hyýalyň hakykata öwrülendigini nygtap, Türkiýäniň milli bähbitleriniň kosmos tehnologiýalarynda-da ileri tutuljakdygyny aýdandygyna ünsleri çekýär.
“Watan” gazeti “Pakistandan soň ikinji “ATAK” işlegi Filippinden” söz başyly habarynda, “T129 ATAK” taktiki barlag we hüjüm dik uçarynyň Pakistandan soň Filippine eksport ediljekdigini ýazýar. Habarda Filippiniň Goranmak minisstri Delfin Lorenzananyň beren beýanatynda satuw boýunça gepleşikleriň birnäçe aýyň dowamynda tamamlanmagynyň göz öňünde tutulýandygyny aýdandygyny okyjy köpçüliginiň dykgatyna ýetirýär.
“Hürriýet” gazeti “Antalýa howa ýoly bilen gelenleriň sany artdy” söz başyly habarynda, syýahatçylyk pudagynyň merkezi Antalýa ýanwar-noýabr aýlarynyň aralygynda howa ýoly bilen 12,5 million daşary ýurtly syýahatçynyň gelendigini, şol sanyň geçen ýyl bilen deňeşdirilende 30 göterim ýokarydygyny mälim edýär. Gazet ýanwar-noýabr aýlarynyň aralygynda daşary ýurtlardan gelen syýahatçylaryň milletlerine görä seljerilende mukdar taýdan 4,5 million adam bilen Russiýanyň birinji orny eýeländigine ünsleri çekýär. Habarda Germaniýanyň 2,2 million bilen ikinji, Ukrainanyň 709 müň syýahatçy bilen 3-nji orny eýeländigi nygtalýar.
“Haber Türk” gazeti “Şebiarus dürli medeniýetlerden adamlary Konýada jemleýär” söz başyly habarynda, Konýada Şebi Arus atlandyrylýan sufiý Hezreti Möwlananyň dünýeden ötmeginiň 745-nji ýylyndaky Halkara hatyralama çarelerinin ýerli we daşary ýurtly syýahatçylaryň gatnaşmagynda dowam edýändigini okyjy köpçüliginiň dykgatyna ýetirýär.
“Star” gazeti “Çaý eksportyndan 6,3 million dollar girdeji” söz başyly habarynda, üstümizdäki ýylyň 11 aýlyk döwründe edilen çaý eksportynyň 6,27 million dollara çenli baryp ýetendigini ýazýar. Gazet gündogar Garadeňiz eksportçylar bileleşiginiň başlygynyň orunbasary Ahmet Hamdi Gündoganyň türk çaýynyň şu ýyl 103 ýurda eksport edilendigini aýdandygyny mälim edýär.
