Türk metbugatynyň gysgaça mazmuny
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
Ýeni Şahak gazedi: “Şyrnakda garaşylmadyk heläkçilik: 13 adam şehit boldy” söz başyly habarynda, Türkiýäniň düýn Şyrnakdan gelen gussaly habar bilen ýasa bogulandygyny mälim edýär. Gazet Kato Dagynda 100-e golaý gowagyň ýer bilen ýegsan edilen operasiýany dolandyran harbylary daşaýan dik uçaryň ýere gaçandygyny habar berýär. Habarda heläkçilikde general-maýor Aýdogan Aýdyn bilen birlikde 13 harbynyň ýogalandygy beýan edilýär. Gazet Türkiýäniň Prezidenti R.T. Erdoganyň gussaly habary Beştepede geçirilen Milli Howpsyzlyk geňeşiniň maslahatyndan soň berilen agzaçarda alandygyny belleýär. Gazet resmilerden maglumat alan Prezident Erdoganyň Baş ştabyň başlygy Hulusi Akara gynanç bildirendigini nygtaýar.
Sabah gazedi: “TANAP turba geçirijisiniň 72 göterimi tamam boldy” söz başyly habarynda, Azerbaýjanyň Prezidenti Ilham Aliýewiň Azerbaýjanyň tebigy gazyny Ýewropa alyp gitjek Günorta gaz koridory taslamasyndaky işleriň meýilnama görä gidýändigini aýdandygyny okyjy köpçüliginiň dykgatyna ýetirýär. Gazet Aliýewiň: “Şahdeniz 2 taslamasynyň 93 göterimi, Günorta Kawkaz geçiriji turbanyň 85 göterimi, Trans Anadoly tebigy gaz geçiriji turbanyň 72 göterimi tamamlandy. Öňümizdäki ýyl TANAP-yň işlemäge başlamagyna garaşýarys” diýendigine ünsi çekýär.
Star gazedi: “Bütindünýä bank: Türkiýe geotermalda nusga ýurt” söz başyly habarynda, Bütindünýä bankynyň Geotermal energatika hünärmeni Thrainn Fridrikssonyň: “Türkiýäniň soňky 10 ýylda geotermal energiýadan elektrik tok öndürmegiň möçberini artdyryp dünýäde ilkinji 7 ýurdyň hataryna goşulmagy tötänlik däl. Bu bir üstünlik hekaýasydyr. Türkiýe 2023-nji ýyldan ozal geotermal energiýada maksat edinen 2 müň mw güýje eýe bolup biler” diýendigini habar berýär.
Ýeni Şafak gazedi: “Gadymy Müsürde Anadolynyň genleri” söz başyly habarynda, Germaniýada geçirilen ylmy-derňewleriň netijesinde Gadymy Müsürde tapylan galyndylaryň genlerinde Anadolyda we Ýewropada ýaşan halklaryň genlerine gabat gelinendigini mälim edýär. Gazet Germaniýada Týubingen uniwersitedi bilen Jenadaky Maks Plank Adamzat taryhy bilimi institutynda geçirilen ylmy-derňewde Müsürden tapylan mumiýalaryň DNK testlerinde Gadymy Müsürde ýaşaýan adamlaryň genleriniň Anadolyda we Ýewropada ýaşaýan halklaryň genlerine meňzeşdi anyklanandygyny belleýär.
Hürriýet gazedi: “Çeh festiwalynda” söz başyly habarynda, režissýory Onur Saýlak, baş rollarda aýaly Tuba Büýüküstün bolan “Ýene-de” filminiň premýerasynyň Çeh Respublikasyndaky Karlowyý Wary Halkara film festiwalynda geçiriljekdigini okyjy köpçüliginiň dykgatyna ýetirýär. Gazet filmiň 30-njy iýun – 8-nji iýulda geçiriljek festiwalyň esasy bölüminde iň uly sylag bolan Hrustal globus üçin bäsleşjekdigini ýazýar.
