Türk metbugatynyň gysgaça mazmuny 12.02.2016
Dünýäniň we ýurduň gün tertibiniň ileri tutulýan ugurlary bilen bagly habarlar gündelik gazetlerde giň seslenme döredýär
“Haber Türk" gazeti “Kilis bütin Ýewropadaka barabar siriýalyny kabul etdi" söz başyly habarynda, Türkiýe bilen Siriýanyň serhet ýakasynda ýerleşýän 90,400 ilatly Kilis welaýatynda 125 müň 700 sany bellige alynan Siriýadan gelen bosgunyň ýaşaýandygyny mälim edýär. Gazet ilatyndan köp bosguny kabul eden Kilisiň Nobeliň parahatçylyk baýragyna dalaşgärlige hödürlenendigini ýazýar. Habarda Kilisiň häkimi Hasan Karanyň: “Kilisin başdan geçirýän wakasy dünýä döräli bäri görülen däldir. Kilise öz ilatyndan köp myhman geldi. Bäş ýyldan bäri dil meselesine, tapawutly däp-dessurlara garamazdan hiç hili kynçylyk ýüze çykmady. Düzgün bozmalar Türkiýedäki we dünýädäki ortaça düzgün bozmalardan az. Asuda we eşretli ýaşaýyşyň syry pidakärlikde we adamkärçilikdedir. Özümizi uruşda ejir çekenleriň ýerine goýup, öýümizi, köçämizi, suwumyzy we howamyzy bölüşdik" diýen sözleri ýerleşdirilýär.
“Sabah" gazeti “Aýlag geçiş köprüsi maý aýynda açylar" söz başyly habarynda, Transport, deňizçilik we aragatnaşyk ministri Binali Ýyldyrymyň Stambul-İzmit awto magistralynyň çäginde gurulýan İzmit aýlag geçiş köprüsiniň we Orhangazi-Samanly geçelgesine baryp görendigini okyjy köpçüliginiň dykgatyna ýetirýär. Gazet dünýäniň ululyk boýunça dördünji köprüsini gurýandygyny aýdan ministr Ýyldyrymyň “Ýalowa-İzmit arasynda 40 kilometrlik bölümi golaýda açarys. Stambul we Geçiş köprüsi bölegi bolsa 10-njy maýda tamamlanar. Ýylyň ahyrynda taslamamyz dolulygyna tamamlanar" diýen sözlerini çap edýär.
“Ýeni Şafak" gazeti “Gönüden halkara maýa goýumlary 32 göterim artdy" söz başyly habarynda, Türkiýäniň iki saýlaw geçiren 2015-nji ýlynda 16,6 milliard gönüden maýa goýumyny özüne çekmegiň hötdesinden gelendigini mälim edýär. Habarda Ministrler kabinetiniň ýanyndaky Türkiýe Maýa goýum goldaw we tanyşdyryş gullugyndan berilen beýanata laýyklykda geçen ýyl Türkiýä gelen gönüden halkara maýa goýumynyň mukdary 16,58 millaird dollara barabar boldy. Şoňa laýyklykda gönüden halkara maýa goýumlary 2015-nji ýylda öňki ýyl bilen deňeşdirilende 32 göterim artdy. Gönüden maýa goýumlardaky birinji üçlükde bolsa İspaniýa, ABŞ we Lýuksemburg durýart.
“Hürriýet" gazeti “Çäre Madonna" söz başyly habarynda, Medeniýet we syýahatçylyk ministri Mahir Ünala berilen habarnamada Russiýa meselesinden soň syýahatçylyk we ekerançylyk pudaklarynda uly ýitgi çeken Antalýadaky ýitginiň 10-11 milliard dollara barabar bolmagyna garaşylýandygy nygtalýar. Gazet şol sebäpli EXPO 2016-nyň uly tanyşdyrlyş çäresine öwrülip biljekdigi, Madonna, Jefer Lopez, Jastin Biber ýaly estrada ýyldyzlarynyň berjek konsertleri bilen ünsleriň Antalýa jemlenmeginiň göz öňünde tutulýandygyny ýazýar.
“Watan" gazeti “NATO türk başlyk saýlandy" söz başyly habarynda, Atylym uniwersitetiniň Raýat awiasiýasy mekdebiniň müdiri professor Nafiz Alemdaroglynyň NATO-nyň ýokary ylmy geňeşi bolan Won Karman institutynyň Geňeşiniň başlyklygyna saýlanandygyny mälim edýär. Habarda Alemdaroglynyň wezipäni üç ýyl möhlet bilen ýerine ýetirjekdigi, NATO-nyň Ylym we tehnologiýa düzümi STO degişli bolan Won Karman institutynyň ylmy işlerini seljermek we geljek bilen bagly ylmy barlag ugurlaryny kesgitlemekden jogapkär ýokary geňeş hökmünde bilinýändigi nygtalýar.
